ចំណាត់ការរបស់ប្រធានាធិបតីអាមេរិក លោក Donald Trump ក្នុងការបិទច្រកសមុទ្រ Hormuz បង្កជាហានិភ័យ ក្នុងការធ្វើឲ្យវិបត្តិដែលកំពុងកើនឡើងជាលំដាប់ កាន់តែធ្ងន់ធ្ងរទៅៗ សម្រាប់សេដ្ឋកិច្ចដែលពឹងផ្អែកលើថាមពលរបស់អាស៊ី ក្នុងនោះរួមទាំងសម្ព័ន្ធមិត្តរបស់អាមេរិក នៅក្នុងតំបន់នេះ និងប្រទេសចិនផងដែរ។

អ្នកវិភាគផ្នែកសេដ្ឋកិដ្ឋឲ្យប្រព័ន្ធផ្សព្វផ្សាយ Bloomberg លោកស្រី Jennifer Welch បានសរសេរនៅក្នុងកំណត់សម្គាល់មួយថា៖ «សម្រាប់សេដ្ឋកិច្ច និងទីផ្សារពិភពលោក ការវិវត្តចុងក្រោយបំផុតនេះ បានបង្វែរការចាប់អារម្មណ៍ខ្លាំងត្រឡប់ទៅរកហានិភ័យនៃការមានស្ថានភាពកាន់តែអាក្រក់វិញ ដោយចង្អុលបង្ហាញពីតម្លៃប្រេងឡើងខ្ពស់ និងការប៉ះពាល់កាន់តែធំទៅលើកំណើន ហើយនិងការធ្វើឲ្យអតិផរណាកើនឡើងភ្លាមៗ»។

នៅថ្ងៃចន្ទ (ទី១៣ ខែមេសា ឆ្នាំ២០២៦) ប្រេងឆៅម៉ាក Brent បានហក់ឡើងរហូតដល់ ៨,៦ភាគរយ ដោយឡើងដល់តម្លៃជាង ១០៣ដុល្លារ ក្នុងមួយបារ៉ែល ខណៈដែលហ៊ុនឧស្ម័នអឺរ៉ុប បានឡើងខ្ពស់ជិត ១៨ភាគរយ ក្នុងរយៈពេលខ្លី។

ទីបញ្ជាការកណ្តាលសហរដ្ឋអាមេរិក បានឲ្យដឹងថា កងកម្លាំងអាមេរិកនឹងចាប់ផ្តើមអនុវត្តការបិទច្រកសមុទ្រ ដែលអនុវត្តចំពោះតែនាវាដែលចូល ឬចាកចេញពីកំពង់ផែរបស់អ៊ីរ៉ង់ ចាប់ពីម៉ោង ១០ព្រឹក ម៉ោងនៅទីក្រុងញូវយ៉ក នាថ្ងៃទី១៣ ខែមេសា។ ការប្រកាសរបស់លោក Trump អំពីផែនការបិទផ្លូវនេះ បានកើតឡើងក្រោយប៉ុន្មានម៉ោងបន្ទាប់ពីសហរដ្ឋអាមេរិក និងអ៊ីរ៉ង់ មិនអាចឈានដល់កិច្ចព្រមព្រៀងមួយ អំឡុងការចរចាដោយផ្ទាល់ នៅក្នុងប្រទេសប៉ាគីស្ថាន។

បណ្ដាប្រទេសអាស៊ី រួមទាំងសម្ព័ន្ធមិត្តរបស់សហរដ្ឋអាមេរិកផងដែរ ដូចជាជប៉ុន និងកូរ៉េខាងត្បូង ប្រើប្រាស់ថាមពលជាង ៨០ភាគរយ ដែលជាធម្មតាឆ្លងកាត់ច្រកសមុទ្រនេះ។ នាវាដឹកប្រេងដែលមានទំនាក់ទំនងជាមួយអ៊ីរ៉ង់ ក៏ដូចជានាវាដទៃទៀតមកពីប្រទេសនានា រួមទាំងប្រទេសចិនដែរ បានឆ្លងកាត់ផ្លូវទឹកដ៏សំខាន់នេះ ជាការធ្វើដំណើរដែលការបិទខ្ទប់នេះ នឹងកំណត់គោលដៅ៕