បាល់ទាត់៖ ក្រុមបាល់ទាត់ជម្រើសជាតិអាយុក្រោម ២៣ឆ្នាំកម្ពុជាត្រៀមចូលរួមការប្រកួតកីឡាអាស៊ីលើកទី១៩ (Asian Games Hangzhou 2022) នៅទីក្រុង Hangzhou ប្រទេសចិននាខែកញ្ញា ឆ្នាំ២០២២ ខាងមុខ បន្ទាប់ពីខកខានអស់រយៈពេល ២៤ឆ្នាំ។ នេះបើតាមការបញ្ជាក់របស់លោក កែវ សារ៉េត អគ្គលេខាធិការសហព័ន្ធកីឡាបាល់ទាត់កម្ពុជា តាមរយៈគេហទំព័រផ្លូវការនៃព្រឹត្តិការណ៍ស៊ីហ្គេមឆ្នាំ២០២៣។
លោក កែវ សារ៉េត បានបញ្ជាក់ថា ក្រុមការងារក្រុមជម្រើសជាតិនៃសហព័ន្ធកីឡាបាល់ទាត់កម្ពុជា កំពុងធ្វើការងារនេះជាមួយគណៈកម្មាធិការជាតិអូឡាំពិកកម្ពុជា (NOCC) ដើម្បីបានបញ្ជូនក្រុមបាល់ទាត់ជម្រើសជាតិ U23 កម្ពុជា ចូលរួមប្រកួតព្រឹត្តិការណ៍កីឡាអាស៊ីលើកដំបូង ក្រោយខកខានអស់ជាច្រើនឆ្នាំ មុនការប្រកួតកីឡាស៊ីហ្គេមលើកទី៣២ ដែលកម្ពុជានឹងធ្វើជាម្ចាស់ផ្ទះនាខែឧសភា ឆ្នាំ២០២៣។ លោក ឈូក ពិសិដ្ឋ អ្នកចាត់ការក្រុមគោព្រៃកម្ពុជាបានបញ្ជាក់បន្ថែមថា ព្រឹត្តិការណ៍ដ៏ធំ ៤ឆ្នាំម្ដងនេះត្រូវបានគេរំពឹងមានប្រទេសច្រើនជាង ៣០ចូលរួមលើប្រភេទកីឡាបាល់ទាត់ដែលសុទ្ធសឹងជាក្រុមខ្លាំង។ ប៉ុន្ដែគោលដៅសំខាន់របស់កម្ពុជាក្នុងការចូលរួមនេះ គឺដើម្បីសម្រួចក្រុមត្រៀមធ្វើម្ចាស់ផ្ទះការប្រកួតកីឡាស៊ីហ្គេមឆ្នាំ២០២៣។ លោករំពឹងថា កម្ពុជានឹងបានជួបក្រុមខ្លាំងៗប្រចាំទ្វីប ដែលជាការប្រកួតកម្រិតខ្ពស់ជាងស៊ីហ្គេមដើម្បីទទួលបានទបពិសោធន៍ និងគុណផលថ្មី សម្រាប់ត្រៀមព្រឹត្តិការណ៍ជាប្រវត្តិសាស្ដ្រនៅកម្ពុជា។
ក្រៅពីការត្រៀមចូលរួមការប្រកួតដ៏ធំប្រចាំទ្វីបនេះ ក្រុមជម្រើសជាតិ U23 កម្ពុជាក៏មានផែនការធ្វើការប្រកួតមិត្តភាពអន្ដរជាតិ និងចូលរួមប្រកួតពានរង្វាន់បាល់ទាត់ជើងឯកអាស៊ីអាគ្នេយ៍ ព្រមទាំងផែនការប្រមូលផ្ដុំហ្វឹកហាត់រយៈពេលវែងមុនស៊ីហ្គេមនៅកម្ពុជាផងដែរ។ នេះបើតាមការបញ្ជាក់បន្ថែមរបស់អ្នកចាត់ការក្រុមជម្រើសជាតិកម្ពុជាលោក ឈូក ពិសិដ្ឋ។ សូមបញ្ជាក់ថា ក្នុងការប្រកួតកីឡាអាស៊ី ៥លើកចុងក្រោយស្មើនឹងរយៈពេល ២៤ឆ្នាំ ក្រុមបាល់ទាត់កម្ពុជាមិនបានចូលរួមព្រឹត្តិការណ៍ប្រចាំទ្វីបនេះឡើយ ក្រោយបង្ហាញខ្លួនលើកចុងក្រោយកាលពីឆ្នាំ១៩៩៨។ ចំពោះការប្រកួតកីឡាអាស៊ីលើកទី១៩ នៅចិនគ្រោងធ្វើឡើងពីថ្ងៃទី១០ ដល់ថ្ងៃទី២៥ ខែកញ្ញា ឆ្នាំ២០២២ ខាងមុខ ដោយម្ចាស់ផ្ទះបានកំណត់កីឡា ៤០ប្រភេទដាក់ឲ្យប្រកួតស្មើនឹង ៦១វិញ្ញាសាធំៗ ក្នុងនោះកម្ពុជាក៏បានប្រកាសជំហរចូលរួមដើម្បីអបអរសាទរម្ចាស់ផ្ទះចិន និងការប្រកួតប្រចាំទ្វីបនេះផងដែរ៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
