លោក ហម អរុណ អនុប្រធានមន្ទីរទេសចរណ៍ខេត្តបាត់ដំបង បានអំពាវនាវដល់បងប្អូនប្រជាពលរដ្ឋ ទេសចរជាតិ និងអន្តរជាតិមកទស្សនាកម្សាន្តសប្បាយក្នុងព្រឹត្តិការណ៍សង្រ្កាន្តបាត់ដំបងឱ្យបានច្រើនកុះករ ខណៈព្រឹត្តិការណ៍ឆ្នាំនេះមានការរៀបចំប្រកបដោយភាពទាក់ទាញ។

លោក ហម អរុណ ថ្លែងឱ្យដឹងបន្ថែមថា ក្នុងចំណោមកម្មវិធីកម្សាន្តសប្បាយជាច្រើន ព្រឹត្តិការណ៍សង្ក្រាន្តឆ្នាំនេះមានរៀបចំបង្ហាញរបៀបចម្អិនម្ហូបអាហារខ្មែរប្រចាំខេត្តបាត់ដំបងជូនភ្ញៀវទេសចរ និងយុវជនជំនាន់ក្រោយឱ្យបានស្គាល់លក្ខណៈពិសេសនៃម្ហូបខ្មែរ។

លោកគូសបញ្ជាក់ថា ការចូលរួមកម្សាន្តសប្បាយក្នុងព្រឹត្តិការណ៍សង្ក្រាន្តបាត់ដំបងជាផ្នែកមួយដ៏សំ ខាន់ ដើម្បីចូលរួមចំណែកឧបត្ថម្ភគាំទ្រដល់វីរកងកម្លាំងជួរមុខ។

រដ្ឋបាលខេត្តបាត់ដំបងបានសហការជាមួយសហភាពសហព័ន្ធយុវជនកម្ពុជាខេត្ត រៀបចំព្រឹត្តិការណ៍ សង្ក្រាន្តបាត់ដំបង២០២៦ ក្នុងគោលបំណងដើម្បីទទួលអំណរស្វាគមន៍ឆ្នាំថ្មីប្រពៃណីជាតិខ្មែរ ព្រមទាំងផ្សព្វផ្សាយពីវប្បធម៌ ប្រពៃណីដ៏ល្អផូរផង់តាមរយៈការរៀបចំកម្មវិធីសិល្បៈរួមមាន ការសម្ដែងល្ខោនខោល និងរបាំនានា ការប្រគំតន្ត្រីរាំលេងកម្សាន្ត ការលេងល្បែងប្រជាប្រិយផ្សេងៗ ជាពិសេសចង់បង្ហាញដល់ភ្ញៀវជាតិ អន្តរជាតិឱ្យស្គាល់ពីទំនៀមទម្លាប់នៃការរស់នៅ ក៏ដូចជាសក្តានុពលនានារបស់ខេត្តបាត់ដំបង តាមរយៈការរៀបចំដាក់តាំងបង្ហាញនូវផលិតផលនៃបណ្តាក្រុង-ស្រុកទាំង១៤ ការបង្ហាញរបៀបធ្វើម្ហូបអាហារ និងបង្អែមខ្មែរ ការតាំងបង្ហាញមុខម្ហូបអ្នកបាត់ដំបង ព្រមទាំងមានការរៀបចំតុបតែងលម្អភ្លើងពណ៌នៅតំបន់សំខាន់ៗក្នុងក្រុងបាត់ដំបង ជាពិសេសដើម្បីកៀរគរធនធានជួយឧបត្ថម្ភគាំទ្រដល់វីរកងកម្លាំងជួរមុខ ដែលកំពុងឈរជើងការពារបូរណភាពទឹកដី៕

ដោយ៖ នឿត សុភ័ក្រ្ត