ក្នុងឱកាសបុណ្យចូលឆ្នាំថ្មីប្រពៃណីខ្មែរ ឆ្នាំមមី ព.ស២៥៧០ សហភាពសហព័ន្ធយុវជនកម្ពុជា សហការ​ជាមួយអាជ្ញាធរមូលដ្ឋានរៀបចំនគរសង្ក្រាន្ត រៀបចំ​គោល​ដៅ​ដើរ​កម្សាន្ត​សប្បាយ​ជា​ច្រើន​កន្លែង​ ក្នុងនោះសម្រាប់គោលដៅ BASAC LANE ភាគច្រើនទទួលបានភ្ញៀវជាបរទេស ចូល​ដើរ​កម្សាន្ត​ ហូបអាហារភេសជ្ជៈ និងលេងល្បែងកម្សាន្តសប្បាយ អប​អរ​សាទរ​ថ្ងៃ​ទី​១ បុណ្យ​ចូល​ឆ្នាំ​ថ្មី​ប្រពៃណី​ខ្មែរ។

ភ្ញៀវបរទេស បានថ្លែងប្រាប់BTV យប់ថ្ងៃទី១៤ ខែមេសានេះថា នៅក្នុងឱកាសថ្ងៃបុណ្យចូលឆ្នាំថ្មី ប្រពៃណី​ខ្មែរ គ្រប់គោលដៅទេសចរណ៍ទាំងអស់នៅរាជធានីភ្នំពេញ គឺមានតុបតែង​ស្អាត​មាន​ភាព​ទាក់​ទាញ​ដើរ​ទស្សនា ក្នុងនោះសម្រាប់គោលដៅ បាសាក់លែន ជាគោលដៅមួយ​មាន​ភាព​ទាក់​ទាញ ​ក្នុងការដើរទស្សនាកម្សាន្តសប្បាយ ភ្លក់ម្ហូបអាហារ និងភេសជ្ជៈបែបខ្មែរ និងបែបបរទេស អម​ដោយ​មានការលេងល្បែងកម្សាន្តតាមបែបខ្មែរ ហើយនៅពេលភ្ញៀវត្រឡប់ទៅប្រទេសគេវិញ ភ្ញៀវនឹ​ងនិ​យាយអំពីបទពិសោធន៍ និងអនុស្សាវរីយ៍ល្អពីកម្ពុជា ផ្សព្វផ្សាយ​ទេសចរ​អន្តរជាតិ​នានា​មកទ​ស្សនាក​ម្ពុជា នាឱកាសបុណ្យចូលឆ្នាំខ្មែរ នៅឆ្នាំក្រោយៗទៀត។

សូមបញ្ជាក់ថា នៅក្នុងព្រឹត្តិការណ៍នគរសង្ក្រាន្ត អបអរសាទរបុណ្យចូលឆ្នាំថ្មី ប្រពៃណីខ្មែរ ឆ្នាំមមី ឆ្នាំ​២០២៦ រយៈពេល៦ថ្ងៃនៅរាជធានីភ្នំពេញ ចាប់ពីថ្ងៃទី១៤ ដល់ថ្ងៃទី១៩ ខែមេសានេះ សហភាព​សហព័ន្ធយុវជនកម្ពុជា បានសហការជាមួយ អាជ្ញាធរមូលដ្ឋានសហការរៀបចំ កម្មវិធី​បង្ហាញ​ទស្សនីយភាពតាមបែបវប្បធម៌ សិល្បៈ សាសនា ប្រមាណជាង២០ទស្សនីយភាពធំៗ នៅ​តាម​ទីតាំ​ងធំៗរួមមាន៖ រមណីយដ្ឋានវប្បធម៌ ប្រវត្តិសាស្ត្រវត្តភ្នំ ភូមិវប្បធម៌នៅជិតផ្សាររាត្រី សួន​ច្បារ​វឌ្ឍនៈ អតីតសួនទីលានធិបតេយ្យ តំបន់ផ្លូវថ្មើរជើងចតុមុខ ផ្សារទួលទំពូង និង​តំបន់​បាសាក់​លែន​ជា​ដើម។

សម្រាប់ថ្ងៃទី២ បុណ្យចូលឆ្នាំថ្មី ប្រពៃណីខ្មែរថ្ងៃទី១៥ ខែមេសានេះ សហភាព​សហព័​ន្ធ​យុវជន​កម្ពុជា​សហការរៀបចំកម្មវិធីបង្ហាញទស្សនីយភាពធំៗ ចំនួន៣ រួមមានៈពេលព្រឹកមានរៀបចំ ពិធី​វេរ​ភត្ត​ប្រគេ​នព្រះសង្ឈ ពូនភ្នំខ្សាច់ នៅរមណីយដ្ឋានវត្តភ្នំ ហើយនៅពេលល្ងាច ពិធីដង្ហែ នគរ​សង្ក្រាន្ត​ នៅផ្លូវថ្មើរជើង និងពិធីសម្តែងល្ខោនយីកេ អ្នកតាឃ្លាំងមឿង នៅភូមិវប្បធម៌ និង​អម​ដោយ​កម្ម​វិធី​កម្សាន្តសប្បាយនានាជាច្រើនទៀត៕ អត្ថបទ ស៊ុម សុខជា