ក្នុងស្មារតីចងចាំនូវគុណូបការៈ និងការលះបង់ដ៏ខ្ពង់ខ្ពស់ចំពោះជាតិ នៅថ្ងៃទី១៤ ខែមេសា ឆ្នាំ២០២៦ ដែលជាថ្ងៃទី១ នៃពិធីបុណ្យចូលឆ្នាំថ្មីប្រពៃណីជាតិខ្មែរ ឆ្នាំមមី អដ្ឋស័ក ព.ស ២៥៦៩ រដ្ឋបាលខេត្តពោធិ៍សាត់បាន រៀបចំពិធីរាប់បាត្រព្រះសង្ឃចំនួន ១២៧អង្គ នៅលើបុរីវប្បធម៌កោះសំពៅមាស ក្នុងក្រុងពោធិ៍សាត់ ដើម្បីឧទ្ទិសកុសលផលបុណ្យជូនដល់បុព្វការីជន និងជាពិសេស គឺវិញ្ញាណក្ខន្ធវីរយុទ្ធជន ដែលបានពលីជីវិតក្នុងបុព្វហេតុការពារមាតុភូមិ។

នៅក្នុងពិធីនេះ មានការអញ្ជើញចូលរួមពីសំណាក់ ឯកឧត្តម ម៉ក់ រ៉ា ប្រធានក្រុមប្រឹក្សាខេត្ត និងឯកឧត្តម ខូយ រីដា អភិបាលនៃគណៈអភិបាលខេត្ត និងលោកជំទាវ ព្រមទាំងមានការនិមន្តចូលរួមពីព្រះមេគណខេត្ត ថ្នាក់ដឹកនាំ មន្ត្រីរាជការ កងកម្លាំងប្រដាប់អាវុធ និងពុទ្ធបរិស័ទយ៉ាងច្រើនកុះករ។ ព្រះសង្ឃជាច្រើនអង្គត្រូវបាននិមន្តមក ដើម្បីទទួលចង្ហាន់ និងបច្ច័យ ដែលជាសទ្ធាជ្រះថ្លារបស់ពុទ្ធបរិស័ទ និងអ្នកចូលរួមទាំងអស់។

ឯកឧត្តម ខូយ រីដា បានថ្លែងថា ការរៀបចំពិធីនេះ មិនត្រឹមតែជាការបំពេញកិច្ចតាមបែបសាសនានោះទេ ប៉ុន្តែគឺជាការបង្ហាញនូវសេចក្តីដឹងគុណចំពោះបុព្វបុរស និងយុទ្ធជនដែលបានលះបង់សាច់ស្រស់ឈាមស្រស់ ដើម្បីនាំមកនូវសន្តិភាពដែលយើងកំពុងមាននៅថ្ងៃនេះ។

ឯកឧត្តមអភិបាលខេត្តបានបញ្ជាក់ថា៖ «យើងមិនត្រូវភ្លេចនូវវីរភាពរបស់បងប្អូនកងទ័ព ដែលបានឈរជើងការពារទឹកដីឡើយ ផលបុណ្យដែលកើតចេញពីការរាប់បាត្រនៅថ្ងៃនេះ សូមឱ្យបានទៅដល់ដួងវិញ្ញាណក្ខន្ធពួកគេឱ្យបានទៅកាន់សុគតិភព»។

បន្ទាប់ពីកិច្ចរាប់បាត្រ ព្រះសង្ឃបានសូត្រមន្តបង្សុកូល និងប្រោះព្រំលើករាសីដល់អ្នកចូលរួម ព្រមទាំងផ្សព្វផ្សាយមេត្តាធម៌ដល់សព្វសត្វលោក។​ សកម្មភាពនេះបានឆ្លុះបញ្ចាំងពីសាមគ្គីភាពរវាងស្ថាប័នរដ្ឋ កងកម្លាំង និងប្រជាពលរដ្ឋ តាមរយៈការរក្សាទំនៀមទម្លាប់ព្រះពុទ្ធសាសនា និងការលើកកម្ពស់ស្មារតីស្នេហាជាតិ។

គួរបញ្ជាក់ថា ពិធីរាប់បាត្របែបនេះ តែងតែត្រូវបានរៀបចំឡើងជាហូរហែក្នុងឱកាសបុណ្យជាតិសំខាន់ៗ ដើម្បីរំលឹកដល់ដួងវិញ្ញាណក្ខន្ធអ្នកមានគុណ និងអ្នកស្នេហាជាតិ ដែលជាគ្រឹះដ៏រឹងមាំសម្រាប់សង្គមជាតិខ្មែរ៕ ដោយ ៖ ពៅ ភារុន