កូរ៉េខាងជើង៖ ប្អូនស្រីដ៏មានឥទ្ធិពលរបស់មេដឹកនាំលោក Kim Jong Un បាននិយាយនៅថ្ងៃអង្គារនេះថា ប្រទេសកូរ៉េខាងជើងមិនចង់បានការផ្ទុះសង្គ្រាមទេ ប៉ុន្តែបើកូរ៉េខាងត្បូងជ្រើសយកការប្រឈមដាក់គ្នាដោយយោធា ឬប៉ុនប៉ងគិតចង់វាយប្រហារនោះ កម្លាំងនុយក្លេអ៊ែររបស់កូរ៉េខាងជើងនឹងត្រូវតែវាយប្រហារ។
ទីភ្នាក់ងារសារព័ត៌មានរដ្ឋកូរ៉េខាងជើង KCNA បានរាយការណ៍ថា លោកស្រី Kim Yo Jong ដែលជាមន្ត្រីជាន់ខ្ពស់មួយរូបក្នុងជួររដ្ឋាភិបាល និងគណបក្សកាន់អំណាចបាននិយាយថា វាជាកំហុសឆ្គងដ៏ធំ សម្រាប់រដ្ឋមន្ត្រីនៃក្រសួងការពារជាតិកូរ៉េខាងត្បូង ក្នុងការធ្វើសេចក្ដីអត្ថាធិប្បាយថ្មីៗពិភាក្សាការវាយប្រហារលើកូរ៉េខាងជើង។ រដ្ឋមន្ត្រីការពារជាតិកូរ៉េខាងត្បូងលោក Suh Wook បាននិយាយកាលពីថ្ងៃសុក្រថា យោធារបស់ប្រទេសលោកមានមីស៊ីលជាច្រើនប្រភេទ ដែលមានសមត្ថភាពកាន់តែប្រសើរឡើងគួរឱ្យកត់សម្គាល់ ភាពច្បាស់លាស់ និងមានកម្លាំងខ្លាំងក្លា ដោយមានសមត្ថភាពវាយប្រហារចំគោលដៅណាមួយភ្លាមៗ នៅក្នុងប្រទេសកូរ៉េខាងជើង។
កូរ៉េខាងជើងបានបាញ់សាកល្បងមីស៊ីលដ៏មានឥទ្ធិពលកាន់តែច្រើននៅឆ្នាំនេះ ហើយក្រុមមន្ត្រីកូរ៉េខាងត្បូង និង Washington បារម្ភថា កូរ៉េខាងជើងអាចត្រៀមបន្តបាញ់សាកល្បងអាវុធនុយក្លេអ៊ែរ ជាលើកដំបូងចាប់តាំងពីឆ្នាំ២០១៧ ស្របពេលការចរចារំសាយនុយក្លេអ៊ែរជាមួយអាមេរិកជាប់គាំង៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
