ប្រជាជនបានទៅប្រមូលផ្តុំគ្នានៅទីក្រុងតេអេរ៉ង់កាលពីយប់ថ្ងៃអាទិត្យ ទី១៩ ខែមេសា ដើម្បីគាំទ្ររដ្ឋាភិបាលអ៊ីរ៉ង់ ដោយមនុស្សមួយចំនួនបានបង្ហាញការមិនទុកចិត្តទាំងស្រុងចំពោះសហរដ្ឋអាមេរិក ដែលរហូតមកដល់ពេលនេះ មិនទាន់បានបំពេញតាមការប្តេជ្ញាចិត្តរបស់ខ្លួននៅឡើយ។

ទីភ្នាក់ងារសារព័ត៌មានរដ្ឋបានរាយការណ៍កាលពីថ្ងៃអាទិត្យថា អ៊ីរ៉ង់បានច្រានចោលការចរចាសន្តិភាពថ្មីជាមួយសហរដ្ឋអាមេរិក ប៉ុន្មានម៉ោងបន្ទាប់ពីប្រធានាធិបតីសហរដ្ឋអាមេរិក លោក ដូណាល់ ត្រាំ បាននិយាយថា លោកនឹងបញ្ជូនបេសកជនទៅកាន់ប្រទេសប៉ាគីស្ថានសម្រាប់ការចរចា ហើយនឹងវាយប្រហារអ៊ីរ៉ង់ ប្រសិនបើអ៊ីរ៉ង់មិនទទួលយកលក្ខខណ្ឌរបស់លោក។

ទីភ្នាក់ងារសារព័ត៌មានផ្លូវការរបស់អ៊ីរ៉ង់ IRNA បានសរសេរថា «អ៊ីរ៉ង់ បាននិយាយថា អវត្តមានរបស់ខ្លួនពីកិច្ចចរចាជុំទីពីរ គឺបណ្តាលមកពីអ្វីដែលខ្លួនហៅថា ជាការទាមទារហួសហេតុរបស់ទីក្រុងវ៉ាស៊ីនតោន ការរំពឹងទុកមិនប្រាកដប្រជា ការផ្លាស់ប្តូរជំហរឥតឈប់ឈរ ការខ្វែងគំនិតគ្នាម្តងហើយម្តងទៀត និងការនៅបន្តបិទផ្លូវទឹក ដែលខ្លួនចាត់ទុកថាជាការរំលោភលើបទឈប់បាញ់»។

បច្ចុប្បន្ននេះ ដោយស្ថិតនៅក្នុងសប្តាហ៍ទី៨ សង្គ្រាមបានបង្កើតការភ្ញាក់ផ្អើលយ៉ាងខ្លាំងចំពោះការផ្គត់ផ្គង់ថាមពលសកលជាប្រវត្តិសាស្ត្រ ដោយធ្វើឱ្យតម្លៃប្រេងហក់ឡើងដោយសារតែការបិទច្រកសមុទ្រ Hormuz។ មនុស្សរាប់ពាន់នាក់ត្រូវបានសម្លាប់ដោយការវាយប្រហាររបស់សហរដ្ឋអាមេរិក-អ៊ីស្រាអែលលើអ៊ីរ៉ង់ និងនៅក្នុងការឈ្លានពានរបស់អ៊ីស្រាអែល លើប្រទេសលីបង់។