យោធាអាមេរិក នៅថ្ងៃព្រហស្បតិ៍ (ទី២៣ ខែមេសា ឆ្នាំ២០២៦) នេះ បានរឹបអូសនាវាដឹកប្រេងមួយគ្រឿងទៀតដែលជាប់ពាក់ព័ន្ធនឹងការរត់ពន្ធប្រេងរបស់អ៊ីរ៉ង់ ដោយធ្វើឲ្យមានការប្រឈមមុខដាក់គ្នាកាន់តែខ្លាំងឡើង ជាមួយទីក្រុងតេអេរ៉ង់ ពោលគឺមួយថ្ងៃបន្ទាប់ពីកងឆ្មាំបដិវត្តន៍ឥស្លាម (IRGC) បានឡើងកាន់កាប់នាវា ២គ្រឿង នៅក្នុងច្រកសមុទ្រ Hormuz ដ៏សំខាន់។

ក្រសួងការពារជាតិបានបញ្ចេញវីដេអូនៃកងកម្លាំងអាមេរិកនៅលើនាវាដឹកប្រេង Majestic X ដែលត្រូវបានរឹបអូស នៅក្នុងមហាសមុទ្រឥណ្ឌា។

សេចក្តីថ្លែងការណ៍របស់មន្ទីរបញ្ចកោណ បានឲ្យដឹងថា៖ «យើងនឹងបន្តការអនុវត្តច្បាប់សមុទ្រសកល ដើម្បីរំខានដល់បណ្តាញខុសច្បាប់ និងហាមឃាត់នាវាដែលផ្តល់ការគាំទ្រសម្ភារៈដល់អ៊ីរ៉ង់ មិនថា ពួកគេធ្វើប្រតិបត្តិការនៅទីណាក៏ដោយ»។

ទិន្នន័យតាមដាននាវា បានបង្ហាញថា នាវា Majestic X នៅក្នុងមហាសមុទ្រឥណ្ឌា ចន្លោះប្រទេសស្រីលង្កា និងឥណ្ឌូនេស៊ី ជាទីតាំងប្រហាក់ប្រហែលនឹងនាវាដឹកប្រេង Tifani ដែលកងកម្លាំងអាមេរិករឹបអូសនៅមុននេះ។ នាវានេះត្រូវធ្វើដំណើរឆ្ពោះទៅកាន់ទីក្រុង Zhoushan ប្រទេសចិន។

មិនមានការឆ្លើយតបភ្លាមៗពីអ៊ីរ៉ង់នោះឡើយ ជុំវិញព័ត៌មាននៃការរឹបអូសនោះទេ។ ការរឹបអូសនេះបានកើតឡើងមួយថ្ងៃបន្ទាប់ពីអ៊ីរ៉ង់បានវាយប្រហារនាវាដឹកទំនិញ ៣គ្រឿង នៅក្នុងច្រកសមុទ្រ Hormuz ដោយឃាត់ទុកបាន ២គ្រឿង ជាចំណាត់ការដែលបានបង្កើនការវាយប្រហាររបស់ខ្លួន លើការដឹកជញ្ជូនទំនិញនៅក្នុងផ្លូវទឹកសំខាន់ដែលការជួញដូរ ២០ភាគរយនៃប្រេងរបស់ពិភពលោកឆ្លងកាត់ច្រកនេះ ក្នុងពេលមានសន្តិភាព៕