អាកាសយានដ្ឋានអន្តរជាតិអ៊ីម៉ាម ខូម៉េនី (Imam Khomeini) របស់អ៊ីរ៉ង់ បានបន្តជើងហោះហើរដឹកអ្នកដំណើរអន្តរជាតិមានកំណត់ បន្ទាប់ពីការផ្អាករយៈពេលជាង៥០ថ្ងៃ ដោយចរាចរណ៍ដឹកអ្នកដំណើរត្រូវបានគេរំពឹងថានឹងងើបឡើងវិញជាបណ្តើរៗ ខណៈផ្លូវហោះហើរបានបើកឡើងវិញជាដំណាក់កាល។

គោលដៅរួមមាន ទីក្រុងមេឌីណាក្នុងប្រទេសអារ៉ាប៊ីសាអ៊ូឌីត ទីក្រុងមូស្កាតក្នុងប្រទេសអូម៉ង់ និងទីក្រុងអ៊ីស្តង់ប៊ុលប្រទេសទួរគី គឺជាគោលដៅដំបូងដែលបានបើកដំណើរការឡើងវិញ ខណៈអ្នកធ្វើដំណើរបានធ្វើដំណើរជាលើកដំបូងចាប់តាំងពីសហរដ្ឋអាមេរិក និងអ៊ីស្រាអែល បើកការវាយប្រហារលើប្រទេសនេះ ដែលជំរុញឱ្យអ៊ីរ៉ង់ វាយប្រហារសងសឹកលើគោលដៅអ៊ីស្រាអែល និងសហរដ្ឋអាមេរិក នៅទូទាំងប្រទេសជាច្រើនក្នុងតំបន់។

សម្រាប់អ្នកដំណើរជាច្រើន ការបើកដំណើរការឡើងវិញបាននាំមកនូវការជួបជុំគ្នាដែលរង់ចាំជាយូរមកហើយជាមួយមនុស្សជាទីស្រលាញ់នៅបរទេស។ ។

អ្នកដំណើរមួយចំនួននៅតែមានការព្រួយបារម្ភ ដោយនិយាយថាបទឈប់បាញ់រវាងសហរដ្ឋអាមេរិក និងអ៊ីរ៉ង់ មានសភាពផុយស្រួយ។ អ្នកដំណើរម្នាក់និយាយថា «យើងមានការព្រួយបារម្ភដោយសារតែសង្គ្រាម ខណៈយើងបានឮសំឡេងផ្ទុះនៅទីក្រុងតេអេរ៉ង់កាលពីប៉ុន្មានយប់មុន»។

មន្ត្រីអាកាសយានដ្ឋានបាននិយាយថា មានតែគោលដៅមួយចំនួនតូចប៉ុណ្ណោះដែលអាចដំណើរការបាននាពេលបច្ចុប្បន្ន ប៉ុន្តែការវិលត្រឡប់ទៅវិញបន្តិចម្តងៗនៃជើងហោះហើរអន្តរជាតិបង្ហាញពីជំហានដ៏ប្រុងប្រយ័ត្នឆ្ពោះទៅរកភាពប្រក្រតីឡើងវិញ ដោយផ្លូវអន្តរជាតិសំខាន់ៗនៅតែស្ថិតក្នុងដំណាក់កាលរៀបចំផែនការ។