ភ្នំពេញ ៖ អាស៊ានបានចេញសេចក្ដីថ្លែងការណ៍ ៥ ចំណុច ក្នុងនោះក៏មានទាំងការគាំទ្រដល់ការអំពាវនាវរបស់អ គ្គលេខាធិការអង្គការសហប្រជាជាតិ ដើម្បីបើកការស៊ើបអង្កេតលើករណីស្លាប់ជនស៊ីវិលនៅអ៊ុយក្រែន រួមទាំងនៅទីក្រុងប៊ូចា ផងដែរ។ នេះបើតាមសេចក្ដីថ្លែងការណ៍របស់រដ្ឋមន្ត្រីការបរទេសអាស៊ានចេញ នៅថ្ងៃទី៨ ខែមេសា ឆ្នាំ២០២២។

សេចក្ដីថ្លែងការណ៍ដែលចេញដោយរដ្ឋមន្ត្រីការបរទេសអាស៊ានដែលមាន ៥ ចំណុចនោះ មានដូចជា៖

១៖ រដ្ឋមន្ត្រីការបរទេសអាស៊ាន សូមចូលរួមរំលែកទុក្ខយ៉ាងក្រៀមក្រំជាទីបំផុតជាមួយប្រជាជនអ៊ុយក្រែន ដែលមានសេចក្ដីរាយការណ៍ថា មានការសម្លាប់ជនស៊ីវិលនៅក្នុងប្រទេសអ៊ុយក្រែន។ រដ្ឋមន្ត្រី ការបរទេសអាស៊ានទាំងអស់ ក៏បានចូលរួមកាន់មរណទុក្ខជាមួយក្រុមគ្រួសារសាច់ញាតិ ដែលបានបាត់បង់មនុស្សជាទីស្រឡាញ់របស់ខ្លួននៅក្នុងជម្លោះនៅទីនោះផងដែរ។

២៖ រដ្ឋមន្ត្រីការបរទេសអាស៊ាន សូមគាំទ្រចំពោះការអំពាវនាវរបស់អគ្គលេខាធិការអង្គការសហប្រជាជាតិ ឱ្យបើកការស៊ើបអង្កេតជុំវិញការចោទប្រកាន់ ពីការប្រព្រឹត្តអំពើសាហាវឃោរឃៅប្រឆាំងជនស៊ីវិលស្លូតត្រង់ ក្នុងនោះរួមមានទាំងនៅទីក្រុងប៊ូចា ដើម្បីបង្ការទប់ស្កាត់កុំឱ្យមានរឿងបែបនេះ កើតឡើងច្រំដែល និងដើម្បីយុត្តិធម៌។

៣៖ រដ្ឋមន្ត្រីការបរទេសអាស៊ាន ក៏បានគូសបញ្ជាក់ពីសារៈសំខាន់នៃច្រកផ្លូវមនុស្សធម៌ ដែលអនុញ្ញាតឱ្យមានការដឹកជញ្ជូនជំនួយមនុស្សធម៌ ប្រកបដោយសុវត្ថិភាព ទៅកាន់ប្រទេសអ៊ុយក្រែន។

៤៖ រដ្ឋមន្ត្រីការបរទេសអាស៊ានក៏បានអំពាវនាវឱ្យមានកិច្ចខិតខំប្រឹងប្រែងយ៉ាងពេញទំហឹង ពីគ្រប់ភាគីពាក់ព័ន្ធទាំងអស់ និងសហគមន៍អន្តរជាតិ ដើម្បីបញ្ឈប់ និងបញ្ចៀស ឱ្យបាននូវរាល់ការវាយប្រយុទ្ធគ្នា ហើយខ្នះខ្នែងបិទបញ្ចប់ មិនមែនធ្វើឱ្យជម្លោះកាន់តែរីកធំ និងការបង្ហូរឈាមគ្នានោះទេ។

៥៖ រដ្ឋមន្ត្រីការបរទេសអាស៊ាន ក៏បានបញ្ជាក់ឡើងវិញពីការអំពាវនាវរបស់ខ្លួន ឱ្យមានបទឈប់បាញ់ជាបន្ទាន់ ហើយបន្តកិច្ចសន្ទនានយោបាយគ្រប់ជ្រុងជ្រោយ ដែលនឹងនាំទៅរកសន្តិភាពជានិរន្តរ៍នៅក្នុ ងប្រទេសអ៊ុយក្រែន៕ ​ដោយ៖ គង់ ឌិន