លោកប្រធានាធិបតី Volodymyr Zelenskyy បានថ្កោលទោសជាសាធារណៈចំពោះអ៊ីស្រាអែល ដែលលោកបានចោទប្រកាន់ពីបទទិញគ្រាប់ធញ្ញជាតិដែលទីក្រុងមូស្គូលួចពីតំបន់កាន់កាប់ដោយរុស្ស៊ីនៅក្នុងប្រទេសអ៊ុយក្រែន។

លោកថាការទិញទំនិញលួចគេនៅក្នុងប្រទេសធម្មតាទាំងអស់គឺជាទង្វើមួយដែលតម្រូវឱ្យមានការទទួលខុសត្រូវផ្នែកច្បាប់។ក្រុមអាជ្ញាធរអ៊ីស្រាអែលមិនអាចមិនដឹងថានាវាណា និងទំនិញអ្វី បានទៅដល់កំពង់ផែរបស់ប្រទេសគេនោះទេ។

លោកប្រធានាធិបតីបានបន្ថែមរូបនេះថា អ៊ុយក្រែន ដោយផ្អែកលើព័ត៌មានពីចារកម្មរបស់ពួកលោក កំពុងរៀបចំកញ្ចប់ទណ្ឌកម្មសមស្របមួយ ដែលនឹងគ្របដណ្តប់ទាំងអ្នកដឹកជញ្ជូនគ្រាប់ធញ្ញជាតិនេះដោយផ្ទាល់ និងបុគ្គល និងនីតិបុគ្គលទាំងនោះដែលព្យាយាមរកប្រាក់ចំណេញពីគម្រោងឧក្រិដ្ឋកម្មបែបនេះ។ 

លោកបានបន្ថែមថា ពួកលោកក៏នឹងសម្របសម្រួលជាមួយដៃគូអឺរ៉ុបផងដែរ ដើម្បីឱ្យបុគ្គលពាក់ព័ន្ធត្រូវបានដាក់បញ្ចូលនៅក្នុងរបបទណ្ឌកម្មរបស់អឺរ៉ុប។

ក្រុមហ៊ុនដឹកជញ្ជូនទំនិញ Panormitis មានទង់ជាតិប៉ាណាម៉ា ដែលត្រូវបានចោទប្រកាន់ថាដឹកគ្រាប់ធញ្ញជាតិត្រូវបានលួចពីទឹកដីអ៊ុយក្រែនកាន់កាប់ដោយរុស្ស៊ី បានចូលទៅក្នុងឈូងសមុទ្រ Haifa កាលពីសប្តាហ៍មុន។ សេវាកម្មត្រួតពិនិត្យចរាចរណ៍សមុទ្របង្ហាញថា នាវានេះកំពុងចតនៅជិតឆ្នេរសមុទ្រអ៊ីស្រាអែល។

ព័ត៌មាននេះបានកើតឡើងបន្ទាប់ពីនាវាមួយផ្សេងទៀត គឺនាវាដឹកទំនិញរុស្ស៊ី Abinsk បានចូលចតនៅកំពង់ផែ Haifa កាលពីដើមខែមេសា ជាមួយនឹងស្រូវសាលីអ៊ុយក្រែនជិត ៤៤.០០០ តោនដែលត្រូវបានលួច ដោយទទួលបានការស្តីបន្ទោសពីទីក្រុងគីវ៕