លោកជំទាវ និន សាផុន ប្រធានគណៈកម្មការសាធារណការ ដឹកជញ្ជូន អាកាសចរស៊ីវិល ប្រៃសណីយ៍ ទូរគមនាគមន៍ ឧស្សាហកម្ម វិទ្យាសាស្ត្រ បច្ចេកវិទ្យា នវានុវត្តន៍ រ៉ែ ថាមពល ពាណិជ្ជកម្ម រៀបចំដែនដី នគរូបនីយកម្ម និងសំណង់ (គណៈកម្មការទី៩) នៃរដ្ឋសភា នៅព្រឹកថ្ងៃទី២៩ ខែមេសា ឆ្នាំ២០២៦ បានដឹកនាំកិច្ចប្រជុំផ្ទៃក្នុង ដើម្បីពិនិត្យ និងពិភាក្សាលើសេចក្តីព្រាងច្បាប់ស្តីពី “ការអនុម័តយល់ព្រមលើការធានាទូទាត់របស់រាជរដ្ឋាភិបាលនៃព្រះរាជាណាចក្រកម្ពុជាជូនដល់ក្រុមហ៊ុនអគ្គិសនីវៀតណាម ”។
គោលបំណងចម្បងនៃសេចក្តីព្រាងច្បាប់នេះ គឺដើម្បីធានាឱ្យបាននូវនិរន្តរភាព ស្ថិរភាព ប្រសិទ្ធភាព តម្លៃសមរម្យ និងសន្តិសុខថាមពលជាតិ ដែលជានិច្ចកាលរាជរដ្ឋាភិបាលតែងតែយកចិត្តទុកដាក់ជំរុញការអភិវឌ្ឍវិស័យថាមពលពីប្រភពចម្រុះ ដើម្បីឆ្លើយតបនឹងកំណើនតម្រូវការប្រើប្រាស់ក្នុងប្រទេស។
យោងតាមលក្ខខណ្ឌនៃកិច្ចព្រមព្រៀងថ្មី កម្ពុជាមានកាតព្វកិច្ចផ្តល់លិខិតធានាជូនក្រុមហ៊ុន EVN របស់វៀតណាម ក្នុងរយៈពេលយ៉ាងយូរ ៦ខែ គិតចាប់ពីថ្ងៃចុះកិច្ចព្រមព្រៀង ដែលត្រូវនឹងថ្ងៃទី៣០ ខែកក្កដា ឆ្នាំ២០២៦ខាងមុខ ដើម្បីជំនួសលិខិតធានាចាស់ដែលបានផុតសុពលភាព។
កិច្ចព្រមព្រៀងថ្មីនេះមានសុពលភាពចំនួន ៤ឆ្នាំ ដោយចាប់ផ្តើមអនុវត្តពីថ្ងៃទី១ ខែមេសា ឆ្នាំ២០២៦ រហូតដល់ថ្ងៃទី១ ខែមេសា ឆ្នាំ២០៣០ខាងមុខ។
គួររំលឹកដែរថា សេចក្តីព្រាងច្បាប់ស្តីពី “ការអនុម័តយល់ព្រមលើការធានាទូទាត់របស់រាជរដ្ឋាភិបាលនៃព្រះរាជាណាចក្រកម្ពុជា ជូនដល់ក្រុមហ៊ុនអគ្គិសនីវៀតណាម EVN មាន ៣មាត្រា នេះ ត្រូវបានគណៈកម្មាធិការអចិន្ត្រៃយ៍រដ្ឋសភា ប្រគល់ភារកិច្ចជូនគណៈកម្មការទី២ (សេដ្ឋកិច្ច ហិរញ្ញវត្ថុ ធនាគារ និងសវនកម្ម) សហការជាមួយគណៈកម្មការទី៩ ដើម្បីសិក្សាស្រាវជ្រាវ និងធ្វើរបាយការណ៍ជូនគណៈកម្មាធិការអចិន្ត្រៃយ៍វិញក្នុងក្របខណ្ឌ "ដោយចាត់ទុកជាការប្រញាប់"។
ការរៀបចំសេចក្តីព្រាងច្បាប់នេះ បានឆ្លុះបញ្ចាំងពីការខិតខំប្រឹងប្រែងរបស់រាជរដ្ឋាភិបាល ដែលមានក្រសួងរ៉ែ និងថាមពល និងក្រសួងសេដ្ឋកិច្ច និងហិរញ្ញវត្ថុ ជាសេនាធិការ ក្នុងការអភិវឌ្ឍវិស័យថាមពល ទាំងប្រភពផលិត និងបណ្តាញបញ្ជូន ក្នុងគោលដៅធានានិរន្តរភាពតម្លៃ និងជំរុញការអភិវឌ្ឍសេដ្ឋកិច្ចជាតិឱ្យកាន់តែរីកចម្រើន៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
