បន្ទាយមានជ័យ៖  ក្នុងពិធីសំណេះសំណាលជាមួយដៃគូសម្ព័ន្ធមេត្រីភាពនៃកងពលតូចថ្មើរជើងលេខ៥១ ឯកឧត្តមសាស្រ្តាចារ្យ ម៉ម ប៊ុនហេង រដ្ឋមន្រ្តីក្រសួងសុខាភិបាល ថ្លែងថា កងទ័ពបានរួមចំណែកយ៉ាងសកម្មក្នុងការទប់ស្កាត់ជំងឺកូវីដ១៩។

ការថ្លែងរបស់ឯកឧត្តមសាស្រ្តាចារ្យ ម៉ម ប៊ុនហេង រដ្ឋមន្រ្តីក្រសួងសុខាភិបាល នៅថ្ងៃទី៩ ខែមេសា ឆ្នាំ២០២២ ក្នុងពិធីសំណេះសំណាលសួរសុខទុក្ខជាមួយដៃគូសម្ព័ន្ធមេត្រីភាព

នាយហាន-ពលទាហាននៃកងពលតូចថ្មើរជើងលេខ៥១។

ពិធីនេះមានការអញ្ជើញចូលរួមពីក្រុមហ៊ុនសុខាអូតែលរីសត ដើម្បីចុះសួរសុខទុក្ខ ដល់នាយទាហាន នាយទាហានរង និងពលទាហាន ក្នុងឱកាសអបអរសាទរ ពិធីបុណ្យចូលឆ្នាំ ប្រពៃណីជាតិខ្មែរ នាថ្ងៃខាងមុខ និងពិធីសម្ពោធដាក់ឲ្យប្រើប្រាស់អគារទីបញ្ជាការវរសេនាតូចថ្មើរជើងលេខ៥១៤ ក៏ដូចជាផ្តល់អំណោយ ជាឱសថ និងសម្ភារបរិក្ខាពេទ្យជាដើម។

នាឱកាសនោះ ឯកឧត្តម ម៉ម ប៊ុនហេង មានប្រសាសន៍ថា ក្នុងដំណាក់កាលរីករាលមេរោគកូវីដ១៩ រាជរដ្ឋាភិបាលក្រោមការដឹកនាំដ៏ឈ្លាសវៃ និងត្រឹមត្រូវរបស់សម្តេចតេជោ ហ៊ុន សែន នាយករដ្ឋមន្រ្តី បានដាក់ចេញនូវគោលការណ៍សំខាន់ៗ ដើម្បីធានាការប្រយុទ្ធប្រឆាំងនឹងជំងឺកូវីដ១៩ ដែលមានសេនាធិការរួមចំណែករដ្ឋបាលរាជធានី-ខេត្ត។

ក្នុងនោះដែរ ឯកឧត្តម ម៉ម ប៊ុនហេង បានថ្លែងថា ការជោគជ័យក្នុងការប្រយុទ្ធប្រឆាំនឹងជំងឺកូវីដ១៨ ក៏មានការរួមចំណែកពីកងទ័ព ដែលបានចូលរួមគ្រប់សកម្មភាពនានា សំដៅឆ្លើយតបបន្ទាន់ចំពោះការរីករាលដាល​មេរោគកូវីដ១៩។ ជាក់ស្តែង ការទប់ស្កាត់ករណីនាំចូលមេរោគកូវីដ១៩ពីប្រទេសជិតខាង និងការចាក់វ៉ាក់សាំងបង្ការជំងឺកូវីដ១៩ផងដែរ។

ទន្ទឹមគ្នានេះ ឧត្តមសេនីយ៍ត្រី សឹង្ហ ទុំ មេបញ្ជាការកងពលតូចថ្មើរជើងលេខ៥១ បានស្វាគមន៍​យ៉ាងកក់ក្តៅជាទីបំផុតដល់ ឯកឧត្តម រដ្ឋមន្រ្តីក្រសួងសុខាភិបាល និងក្រុមហ៊ុនសុខាអូតែលរីសត ដែលតែងតែយកចិត្តទុកដាក់ រួមសុខរួមទុក្ខ គិតគូរពីទុក្ខលំបាករបស់កងកម្លាំងប្រដាប់អាវុធ ព្រមទាំងបានចូលរួមចំណែកជួយឧបត្ថម្ភគាំទ្រ ទាំងស្មារតី សម្ភារ ថវិកា ដែល​ស​បញ្ជាក់​ឲ្យ​ឃើញ​យ៉ាងច្បាស់ អំពីការអាណិតស្រឡាញ់ ការយកចិត្តទុកដាក់ ការរួមសុខ រួមទុក្ខការផ្សារភ្ជាប់គ្នា​យ៉ាង​ជិតស្និទ្ធ រវាងសមរភូមិមុខ នឹងសមរភូមិក្រោយ រវាងមន្ត្រីរាជការស៊ីវិល ជាមួយកង​កម្លាំង​ប្រដាប់អាវុធគ្រប់ប្រភេទ ស្របតាមគោលនយោបាយ​ដឹកនាំប្រកប​ដោយគតិបណ្ឌិតរបស់សម្តេចតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា។

ក្នុងឱកាសចុះសួរសុខទុក្ខនោះដែរ ឯកឧត្តម រដ្ឋមន្រ្តី ក្រសួងសុខាភិបាល និងក្រុមហ៊ុនសុខាអូតែលរីសត បាននាំយកអំណោយ ចែកជូនដល់កងកម្លាំង កងពលតូចថ្មើរជើងលេខ៥១រួមមាន គ្រឿងឧបភោគ បរិភោគ ឱសថ សម្ភារបរិក្ខាពេទ្យ និងថវិកាមួយចំនួនផងដែរ៕ អត្ថបទ៖ សេក ឧត្ដម