ប្រព័ន្ធផ្សព្វផ្សាយអ៊ីតាលី បានរាយការណ៍នៅថ្ងៃចន្ទ (ទី៤ ខែឧសភា ឆ្នាំ២០២៦) នេះ ថា រដ្ឋអាជ្ញាអ៊ីតាលីបានបើកការស៊ើបអង្កេតការឃុំខ្លួនដោយខុសច្បាប់ បន្ទាប់ពីការវាយឆ្មក់ដោយកងកម្លាំងអ៊ីស្រាអែលលើកងនាវាជំនួយ ១គ្រឿងដែលធ្វើដំណើរឆ្ពោះទៅកាន់តំបន់ហ្កាហ្សា។

ការស៊ើបអង្កេតនេះត្រូវបានបើកដំណើរការ បន្ទាប់ពីទទួលបានពាក្យបណ្តឹង ពាក់ព័ន្ធនឹងការឃុំខ្លួនពលរដ្ឋអេស្ប៉ាញឈ្មោះ Saif Abu Keshek និងជនជាតិប្រេស៊ីលឈ្មោះ Thiago Avila ដែលនៅលើនាវាមានទង់ជាតិអ៊ីតាលី កាលពីសប្តាហ៍មុន។

តុលាការអ៊ីស្រាអែលកាលពីថ្ងៃអាទិត្យ បានពន្យារការឃុំខ្លួនសកម្មជន ២នាក់ដែលត្រូវបាននាំខ្លួនទៅអ៊ីស្រាអែល ដើម្បីសួរចម្លើយរយៈពេល ២ថ្ងៃ។

អ្នកទាំង ២ ស្ថិតនៅលើនាវា ក្នុងចំណោមកងនាវាជាង ៥០គ្រឿងដែលចាកចេញពីបារាំង អេស្ប៉ាញ និងអ៊ីតាលី ក្នុងគោលបំណងទម្លុះការបិទខ្ទប់ផ្លូវរបស់អ៊ីស្រាអែល ចំពោះតំបន់ហ្កាហ្សា និងនាំយកសម្ភារៈទៅកាន់ដែនដីប៉ាឡេស្ទីនដែលត្រូវបានបំផ្លិចបំផ្លាញមួយនេះ។

នាវាទាំងនោះត្រូវបានស្ទាក់ចាប់នៅក្នុងដែនទឹកអន្តរជាតិ នៅជិតម្ដុំឆ្នេរសមុទ្ររបស់ក្រិក កាលពីថ្ងៃព្រហស្បតិ៍ ដោយអ៊ីស្រាអែលប្រាប់ថា ខ្លួនបាននាំយកសកម្មជនប្រមាណ ១៧៥នាក់ចេញពីនាវា។ លោក Avila និងលោក Abu Keshek ត្រូវបាននាំទៅអ៊ីស្រាអែល ដើម្បីសួរចម្លើយ ខណៈដែលសកម្មជនផ្សេងទៀតត្រូវបានដោះលែង។

ប្រតិបត្តិការរបស់អ៊ីស្រាអែលនេះ ត្រូវបានរិះគន់យ៉ាងទូលំទូលាយ ជាពិសេសដោយអ៊ីតាលី និងអេស្ប៉ាញ។ ការិយាល័យរដ្ឋអាជ្ញាទីក្រុងរ៉ូម បានបើកការស៊ើបអង្កេតស្រដៀងគ្នានេះ កាលពីខែតុលាឆ្នាំមុន បន្ទាប់ពីមានការប៉ុនប៉ងកាលពីមុន ដោយកងនាវាមនុស្សធម៌ ដើម្បីទៅដល់តំបន់ហ្កាហ្សា៕