ប្រធានាធិបតីលីបង់ លោក Joseph Aoun កាលពីថ្ងៃចន្ទ បាននិយាយថា កិច្ចព្រមព្រៀងសន្តិសុខ និងការបញ្ចប់ការវាយប្រហាររបស់អ៊ីស្រាអែល គឺត្រូវការជាចាំបាច់ មុនពេលជួបជាមួយនាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ (Benjamin Netanyahu) ដែលត្រូវបានស្នើឡើងដោយទីក្រុងវ៉ាស៊ីនតោន។

ការិយាល័យរបស់លោក Aoun បាននិយាយនៅក្នុងសេចក្តីថ្លែងការណ៍មួយថា លោកប្រធានាធិបតី «បានបញ្ជាក់ជាថ្មីនូវទស្សនៈរបស់លោកថា ពេលវេលាមិនសមរម្យសម្រាប់កិច្ចប្រជុំជាមួយលោក ណេតាន់យ៉ាហ៊ូ នៅពេលនេះទេ។

សេចក្តីថ្លែងការណ៍នេះ បានដកស្រង់សម្តីរបស់លោក Aoun ដែលបានថ្លែងថា៖«យើងត្រូវតែឈានដល់កិច្ចព្រមព្រៀងសន្តិសុខជាមុនសិន ហើយបញ្ឈប់ការវាយប្រហាររបស់អ៊ីស្រាអែលមកលើយើង មុនពេលយើងលើកឡើងពីបញ្ហានៃកិច្ចប្រជុំរវាងយើងនិងលោក ណេតាន់យ៉ាហ៊ូ។

តំណាងអ៊ីស្រាអែល និងលីបង់កាលពីខែមុន បានជួបគ្នាពីរដងនៅទីក្រុងវ៉ាស៊ីនតោន ជាកិច្ចប្រជុំលើកដំបូង ក្នុងរយៈពេលជាច្រើនទសវត្សរ៍ ដែលបានកើតឡើងបន្ទាប់ពីក្រុមហេសបូឡាគាំទ្រដោយអ៊ីរ៉ង់ បានទាញប្រទេសលីបង់ចូលទៅក្នុងសង្គ្រាមមជ្ឈិមបូព៌ា នៅថ្ងៃទី ០២ ខែមីនា ដែលបង្កឲ្យមានការវាយប្រហារយ៉ាងខ្លាំង និងការឈ្លានពានដោយកង័ពជើងគោករបស់អ៊ីស្រាអែល៕