ក្រុមជើងឯក ព្រះខ័នរាជស្វាយរៀង នឹងត្រូវបើកទ្វារពហុកីឡដ្ឋានជាតិមរតកតេជោ ទទួល​ក្រុម​បឹង​កេត ក្នុងជំនួបសប្ដាហ៍ទី៣១ នៃលីគកំពូលកម្ពុជា ឆ្នាំ២០២៥/២៦ នាល្ងាចថ្ងៃទី៧ ខែឧសភា ឆ្នាំ​២០២៦ មុនចេញដំណើរទៅទឹកដីអារ៉ាប់ ដើម្បី​ត្រៀម​ការ​ប្រកួត​វគ្គ​ផ្ដាច់​ព្រ័ត្រ​ពាន​រង្វាន់​កម្រិត​ទី៣​ ទ្វីបអាស៊ី AFC Challenge League 2025/26 ទល់ក្រុមម្ចាស់ផ្ទះ Al Kuwait របស់កូវ៉ែត នាថ្ងៃទី១៣ ខែឧសភាខាងមុខ។

ជំនួប​លើកទី៤ រវាងក្រុមទាំងពីរ នារដូវកាលនេះ ដំបូងឡើងត្រូវប្រកួតនៅថ្ងៃទី១០ ខែឧសភា តែ​ដោយ​សារកៀកថ្ងៃប្រកួតវគ្គផ្ដាច់ព្រ័ត្រពានកម្រិតទី៣ ទ្វីបអាស៊ី របស់ក្លិបព្រះខ័នរាជស្វាយរៀង ហើយ​ត្រូវប្រកួតក្រៅដីផងនោះ ភាគីពាក់ព័ន្ធ ទាំងក្លិបព្រះខ័នរាជស្វាយរៀង បឹងកេត ក៏ដូចជា​ក្រុម​ហ៊ុន​ខេមបូឌានព្រីមៀរលីគ ក៏បានសម្រេចលើកជំនួបសប្ដាហ៍ទី៣១ រវាងក្រុមទាំងពីរ មក​នៅ​ថ្ងៃ​ទី​៧ ខែឧសភាស្អែកនេះវិញ ដើម្បីទុកពេលឲ្យព្រះខ័នរាជស្វាយរៀង មានពេល​គ្រប់​គ្រាន់​សម្រាប់​ត្រៀម​លក្ខណៈប្រកួតប្រជែងពានកម្រិតទ្វីប ក្នុងនាមក្លិបតំណាងកម្ពុជា។

ក្រឡេក​ទៅចាប់អារម្មណ៍ការប្រកួតនេះដែរ ឆ្លងកាត់ការជួបគ្នាក្នុងលីគ ៣លើកកន្លងមក ក្រុម​ទាំង​ពីរ​ បានឈ្នះម្ដងម្នាក់ និងស្នើគ្នាម្ដង ពោលគឺជួបលើកទី១ ព្រះខ័នរាជស្វាយរៀង ឈ្នះ ៣-០ ខណៈ​ជួបគ្នាលើកទី២ បឹងកេត ឈ្នះ ២-១ និងលើកទី៣ ស្មើគ្នា ០-០។

ជំនួប​នា​ថ្ងៃព្រហស្បតិ៍នេះ អាចជាការប្រកួតធម្មតាសម្រាប់ព្រះខ័នរាជស្វាយរៀង ដែល​បាន​ក្លាយ​ជា​ជើង​ឯកផ្លូវការ តែគឺជាការប្រកួតដ៏សំខាន់មួយ សម្រាប់ក្រុមបឹងកេត ដែលកំពុងត្រូវការពិន្ទុ ដើម្បីមានឱកាសប្រជែងចំណាត់ថ្នាក់លេខ២ ជាមួយភ្នំពេញក្រោន និងអង្គរថាយហ្គឺរ ដែលកំពុងនាំមុខខ្លួន ៣ពិន្ទុ ដើម្បីមានឱកាសលេងពានរង្វាន់អន្ដរជាតិ នារដូវកាលឆ្នាំ២០២៦/២៧ ក្នុងនាមក្លិបតំណាងកម្ពុជាមួយ ដែលទទួលបានអាជ្ញាប័ណ្ណពី AFC នារដូវកាលថ្មី។

បច្ចុប្បន្នព្រះខ័នរាជស្វាយរៀង មាន ៦៦ពិន្ទុ ឈរកំពូលតារាង តាមពីក្រោយដោយភ្នំពេញក្រោន ឈរលេខ២ និងអង្គរថាយហ្គឺរ ឈរលេខ៣ មាន ៥០ពិន្ទុស្មើគ្នា គ្រាដែលបឹងកេត មាន ៤៧ពិន្ទុ ឈរលេខ៤។ ដូច្នេះប្រសិនបើបឹងកេត អាចយកឈ្នះក្រុមជើងឯកព្រះខ័នរាជ នាថ្ងៃស្អែក ពួកគេនឹងមានពិន្ទុស្មើភ្នំពេញក្រោន និងអង្គរថាយហ្គឺរ ហើយក៏មានក្ដីសង្ឃឹមខ្ពស់ ដើម្បីប្រជែងចំណាត់ថ្នាក់លេខ២ នៃលីគកំពូលកម្ពុជា រដូវកាលនេះផងដែរ៕ អត្ថបទ លី ឈុនឡា