កណ្ដាល៖ ក្នុងឱកាសបុណ្យចូលឆ្នាំថ្មីប្រពៃណីជាតិខ្មែរ ដែលនឹងឈាននមកដល់ក្នុងពេលឆាប់ៗនេះ លោកជំទាវកិត្តិបណ្ឌិត អ៊ុក ម៉ាលី អគ្គហេរញ្ញិក កាកបាទក្រហមកម្ពុជា តំណាងដ៏ខ្ពង់ខ្ពស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា នៅថ្ងៃទី១០ខែមេសាម្សិលមិញនេះ បានអញ្ជើញបូជាទៀន ធូប ផ្កាភ្ញី ថ្វាយព្រះរតនត្រ័យ និងនាំយកទេយ្យវត្ថុបច្ច័យទៅវេរប្រគេនចំពោះព្រះសង្ឃគង់នៅវត្តប្រជុំនទី (ហៅវត្តក្រពើហា) ស្ថិតនៅសង្កាត់ព្រែកឫស្សី ក្រុងតាខ្មៅ ខេត្តកណ្តាល។

ស្ថិតក្នុងឱកាសនោះ លោកជំទាវកិត្តិបណ្ឌិត បានពាំនាំនូវប្រសាសន៍របស់សម្ដេចកិត្តិព្រឹទ្ធបណ្ឌិត ប៊ុន រ៉ានីហ៊ុន សែន ប្រធានកាកបាទក្រហមកម្ពុជា ដែលផ្តាំផ្ញើសួរសុខទុក្ខ និងការគិតគូរពី​សុខុមាលភាព​ចំពោះព្រះសង្ឃគ្រប់ព្រះអង្គ។

ជាមួយគ្នានេះលោកជំទាវកិត្តិបណ្ឌិត បានមានប្រសាសន៍ថា «វត្តក្រពើហា មិនត្រឹមតែ​ជាទីគោរពសក្ការៈសម្រាប់ពុទ្ធបរិស័ទគ្រប់ទិសទីប៉ុណ្ណោះទេ ថែមទាំងជាថ្នាល បណ្តុះបណ្តាល ដល់សាមណសង្ឃទាំងអស់ ជាពិសេសបានជ្រួតជ្រាប យល់ដឹង និងផ្សព្វផ្សាយពីតម្លៃ​នៃ​សុខសន្តិភាពនិងការអភិវឌ្ឍប្រទេសជាតិផង»។

ព្រះឃោសមុនីវង្ស វ័ន្ត វណ្ណោ ព្រះរាជាគណៈកិត្តិយស ព្រះលេខាធិការគណខេត្តកណ្តាល នាយកពុទ្ធិកវិទ្យាល័យ ប៊ុន រ៉ានី ហ៊ុន សែន ក្រពើហា និងជាព្រះចៅអធិការវត្តប្រជុំនទី (ហៅក្រពើហា) បានថ្លែងអំណរគុណចំពោះសម្តេចកិត្តិព្រឹទ្ធបណ្ឌិតប៊ុន រ៉ានី ហ៊ុនសែន ដែលតែងតែយកចិត្តទុកដាក់គិតគូរពីសុខទុក្ខរបស់ប្រជាពលរដ្ឋពីសុខុមាលភាពរបស់ព្រះសង្ឃ និងតែងតែលើកទឹកចិត្ត ចូលរួមចំណែក លើកស្ទួយវិស័យព្រះពុទ្ធសាសនាឱ្យមានការ រីកចម្រើន ហើយជាពិសេសតែងតែជួយសម្រាលការលំបាកដល់ព្រះសង្ឃដែលគង់នៅក្នុងវត្ត ក្រពើហា ក៏ដូចជាព្រះសង្ឃកំពុងបំពេញវិជ្ជា ​នៅពុទ្ធកវិទ្យាល័យ ប៊ុន រ៉ានី ហ៊ុនសែន ក្រពើហា ចំនួន ៣១៤អង្គផងដែរ។

ព្រះឃោសមុនីវង្ស វ័ន្ត វណ្ណោ ក៏បានថ្លែងអំណរគុណយ៉ាងជ្រាលជ្រៅ និងកោតសរសើរចំពោះ សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ដែលមានការដឹកនាំដ៏​ឈ្លាសវៃ​ប្រកបដោយគតិបណ្ឌិត មានយុទ្ធសាស្ត្រច្បាស់លាស់​ក្នុងការប្រយុទ្ធនឹង​ជំងឺ​រាតត្បាត​សកលកូវីដ-១៩ ជាពិសេសយុទ្ធសាស្ត្រចាក់ស្រោចវ៉ាក់សាំងដល់ប្រជាពលរដ្ឋទូទាំងប្រទេស ក៏ដូចជាព្រះសង្ឃទាំងអស់ ដែលនេះគឺជាទេយ្យទានដ៏មានតម្លៃសម្រាប់ព្រះសង្ឃគ្រប់រូប​ឱ្យចាក​ផុតពី​គ្រោះថ្នាក់នៃជំងឺរាតត្បាតមួយនេះ។

ជាមួយគ្នានេះ ព្រះឃោសមុនីវង្ស វ័ន្ត វណ្ណោ ក៏បានជូនពរសព្ទសាធុការដល់សម្តេចកិត្តិព្រឹទ្ធបណ្ឌិត និងសម្តេចតេជោ ហ៊ុន សែន ព្រមទាំងបុត្រាបុត្រី ចៅប្រុសចៅស្រី សូមជួបប្រទះតែ​នឹង​ព្រះពុទ្ធពរ​ទាំងបួនប្រការ គឺអាយុ វណ្ណៈ សុខៈ និងពលៈ កុំបីឃ្លៀងឃ្លាតឡើយ ដើម្បីបន្តដឹកនាំព្រះរាជា​ណា​ចក្រ​កម្ពុជា ឱ្យរក្សាបាននូវភាព សុខដុមរមនា សន្តិភាព និងការអភិវឌ្ឍជានិច្ចនិរន្តរ៍។

ទន្ទឹមនឹងនេះ​សូមឧទ្ទិសមហាកុសលផលបុណ្យនាថ្ងៃនេះ ជូនចំពោះដួងវិញ្ញាណក្ខន្ធលោក​មហាឧបាសក លីន គ្រី និងអ្នកឧកញ៉ា ព្រឹទ្ធមហាឧបាសិកា ធម្មញ្ញាណវិវឌ្ឍនា ប៊ុន ស៊ាងលី ដែលជាបិតា មាតាបង្កើតរបស់សម្ដេចកិត្តិព្រឹទ្ធបណ្ឌិត ប៊ុន រ៉ានី ព្រមទាំង វិញ្ញាណក្ខន្ធអ្នក​ឧកញ៉ា​មហាភក្តី សប្បុរិសភោគាធិបតី ហ៊ុន នាង និងលោកយាយមហាឧបាសិកា ឌី ប៉ុក ដែលជាបិតា មាតា​បង្កើត​របស់​សម្តេចតេជោ ហ៊ុនសែន ផងដែរ។

សូមបញ្ជាក់ថា សម្រាប់វត្តក្រពើហា សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន តែងតែចាត់​ឱ្យសហការីនាំយកទេយ្យទាន និងបច្ច័យមកប្រគេនព្រះសង្ឃជារៀងរាល់ឆ្នាំ ហើយដែល ថ្ងៃនេះ បានប្រគេនបច្ច័យចំនួន ១០លានរៀល និងទេយ្យវត្ថុរួមមាន៖ អង្ករ ១តោន, មី២០កេស, ត្រីខ ២កេសធំ (ស្មើ ២០០កំប៉ុង) , ទឹកស៊ីអ៊ីវ ១០ឡូ (ស្មើ ១២០ដប), ទឹកត្រី ១០ឡូ (ស្មើ ១២០ដប), ទឹកក្រូច ៥កេស , ទឹកត្រឡាច ៥កេស, ទឹកគូលេន ៥កេស, ទឹកសណ្តែក ៥កេស, មៀនកំប៉ុង ២កេស, ទឹកបរិសុទ្ធអារុណា ១០កេស, ទឹកដោះគោខាប់ ២កេស, អូរវ៉ាន់ទីន ២កេស, តែ ៥គីឡូក្រាម , ស្ករស ១០គីឡូក្រាម, ត្រីងៀត ១០គីឡូក្រាម , សាច់ក្រក ១០គីឡូក្រាម , ម៉ាស់ ២កេស (ស្មើ ៧.០០០ម៉ាស់), ​ជែលលាងដៃ ៥កេស (ស្មើ ២៥០ដបតូច) ​និងអាល់កុល ២កាន (ស្មើ ៦០លីត្រ) ។

ប្រគេនព្រះចៅអធិការវត្ត នូវសាដក ១ និងបច្ច័យ ២លានរៀល ។ ប្រគេន ព្រះសង្ឃ ៤អង្គ ក្នុងមួយអង្គៗ សាដក១ និងបច្ច័យ ២០ម៉ឺនរៀល៕