ក្រុមមន្រ្តីឆ្មាំល្បាតឆ្នេរ បានព្យាយាមទប់ស្កាត់លទ្ធភាពនៃការលេចប្រេងណាមួយ ក្រោយនាវាដឹកទំនិញមួយគ្រឿង ធ្វើដំណើរឆ្ពោះទៅកាន់ប្រទេសអ៊ុយក្រែន បានលិចនៅជិតកោះ Andros របស់ប្រទេសក្រិកនាព្រឹកថ្ងៃពុធនេះ ។ 

 មន្រ្តីឆ្មាំល្បាតឆ្នេរក្រិកនិយាយថា សមាជិកនាវិកទាំង ៩នាក់ ក្នុងនោះ ៨នាក់ គឺជាជនជាតិទួរគី និងម្នាក់ គឺជាជនជាតិអាស៊ែបៃហ្សង់ ត្រូវបានជួយសង្រ្គោះចេញពីនាវាដឹកទំនិញដោតទង់ជាតិវ៉ានូអាទូ ដែលបានធ្វើដំណើរចេញពីប្រទេសអាល់បានី ជាមួយសូដារាប់រយតោននៅលើនាវា ពេលដែលវាលិចនៅជិតកោះ Andros ក្រោយបើកកឿងបុកថ្ម ។

 គេនៅមិនទាន់ដឹងច្បាស់ភ្លាមៗនោះទេថាតើ មូលហេតុអ្វីបានជាធ្វើឲ្យនាវាមួយគ្រឿងនេះដែលជានាវា Corsage C បានបើកកឿងបែបនេះ ។ មន្រ្តីរដ្ឋាភិបាលក្រិកនិយាយថា ការស៊ើបអង្កេតបឋម ត្រូវបានធ្វើឡើង ។

 អ្នកនាំពាក្យក្រសួងដឹកជញ្ជូនក្រិកនិយាយដែរថា នាវាឆ្មាំល្បាតឆ្នេរប្រឆាំងការបំពុល និងនាវាមួយគ្រឿងទៀតដឹកឧបករណ៍ប្រឆាំងការបំពុល ត្រូវបានបញ្ជូនទៅកាន់របាំងបណ្តែត ដើម្បីទប់ស្កាត់ការលេចប្រេងណាមួយ ។

 ប្រតិបត្តិការជួយសង្រ្គោះ បានធ្វើឡើង ក្រោយនាវាចេញសញ្ញាអាសន្ននៅព្រឹកថ្ងៃពុធ ដោយពួកគេរាយការណ៍ថា នាវាបានបើកកឿង ហើយនិងលិចចូលទឹក ៕