តម្លៃប្រេងបានកើនឡើងប្រហែល ១ដុល្លារអាមេរិកក្នុងការជួញដូរដំបូងនៅព្រឹកថ្ងៃព្រហស្បតិ៍ ៧ឧសភា សប្ដាហ៍នេះ ជាការកើនឡើងវិញពីការធ្លាក់ចុះកាលពីមួយថ្ងៃមុន ខណៈក្រុមវិនិយោគិន បានថ្លឹងថ្លែងពីលទ្ធភាពជោគជ័យនៃកិច្ចព្រមព្រៀងសន្តិភាពនៅមជ្ឈិមបូព៌ា ។ 

តម្លៃប្រេងឆៅ Brent បានកើនឡើង៨៨សេន ឬ០,៩% ដល់តម្លៃ១០២,១៥ ដុល្លារក្នុងមួយបារ៉ែល នៅម៉ោង ០០ និង៣២នាទី ម៉ោងសកល ចំណែកតម្លៃប្រេង West Texas Intermediate បានហក់ឡើង១,១២ដុល្លារអាមេរិក ឬ ១,២% ដល់៩៦,២០ ដុល្លារអាមេរិកក្នុងមួយបារែល។ 

សន្ទស្សន៍តម្លៃគោលទាំងពីរបានធ្លាក់ចុះជាង ៧% កាលពីថ្ងៃពុធ សប្ដាហ៍នេះ ដោយធ្លាក់ចុះដល់កម្រិតទាបបំផុតក្នុងរយៈពេលពីរសប្តាហ៍ ដោយសារសុទិដ្ឋិនិយមលើលទ្ធភាពនៃការបញ្ចប់សង្គ្រាមមជ្ឈិមបូព៌ា។ ទោះជាយ៉ាងណាក៏ដោយ ការធ្លាក់តម្លៃទាំងនេះកើតឡើង បន្ទាប់ពីប្រធានាធិបតីអាមេរិក លោក Donald ⁠Trump បាននិយាយថា វា «លឿនពេក» សម្រាប់ការចរចាទល់មុខគ្នាជាមួយទីក្រុងតេអេរ៉ង់ ហើយសមាជិកសភាជាន់ខ្ពស់អ៊ីរ៉ង់មួយរូបបាននិយាយថា សំណើរបស់សហរដ្ឋអាមេរិកគឺជាបញ្ជីបំណងប្រាថ្នាច្រើនជាងការពិត។

លោក Hiroyuki Kikukawa ប្រធានយុទ្ធសាស្ត្រនៃក្រុមហ៊ុន Nissan Securities Investment ដែលជាអង្គភាពមួយរបស់ក្រុមហ៊ុន Nissan Securities Group Co Ltd បាននិយាយថា ខណៈការចរចាសន្តិភាពទំនងជានឹងបន្តយ៉ាងហោចណាស់រហូតដល់កិច្ចប្រជុំកំពូលអាមេរិក-ចិននៅសប្តាហ៍ក្រោយ ទស្សនវិស័យលើសពីនេះនៅតែមិនច្បាស់លាស់៕