នាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ (Benjamin Netanyahu) កាលពីថ្ងៃពុធ បានច្រានចោលរបាយការណ៍ដែលថា អ៊ីស្រាអែលត្រូវបានរំខានដោយចលនាការទូតរបស់ទីក្រុងវ៉ាស៊ីនតោនចំពោះអ៊ីរ៉ង់ ដោយនិយាយថា លោកកំពុងទាក់ទងជាមួយប្រធានាធិបតីអាមេរិក លោក ដូណាល់ ត្រាំ (Donald Trump) ស្ទើរតែរាល់ថ្ងៃ ដើម្បីធានាបាននូវការសម្របសម្រួលយ៉ាងពេញលេញ។

លោក ណេតាន់យ៉ាហ៊ូ បាននិយាយថា៖«យើងបន្តទាក់ទងជាមួយមិត្តភក្តិរបស់យើង នៅសហរដ្ឋអាមេរិក»។ «ខ្ញុំនិយាយជាមួយលោកប្រធានាធិបតី ត្រាំ ស្ទើរតែរាល់ថ្ងៃ។ ប្រជាជនរបស់ខ្ញុំ និងប្រជាជនរបស់លោក និយាយគ្នាជារៀងរាល់ថ្ងៃ រួមទាំងថ្ងៃនេះផងដែរ»។

លោកបានបន្ថែមថា លោកមានគម្រោងធ្វើការសន្ទនាតាមទូរស័ព្ទជាមួយលោក ត្រាំ ម្តងទៀត នៅយប់ថ្ងៃពុធនេះ។

លោក ណេតាន់យ៉ាហ៊ូ បានបញ្ជាក់ថា អ៊ីស្រាអែល «ត្រៀមខ្លួនសម្រាប់ស្ថានភាពទាំងអស់» ក្នុងការដោះស្រាយជាមួយអ៊ីរ៉ង់ ដោយបន្ថែមថា អ៊ីស្រាអែល និងសហរដ្ឋអាមេរិក មានបំណងដូចគ្នា «ដោយគោលដៅសំខាន់បំផុត គឺការដកយកសារធាតុអ៊ុយរ៉ានីញ៉ូមដែលចម្រាញ់រួចចេញពីប្រទេសអ៊ីរ៉ង់។

មន្ត្រីអ៊ីស្រាអែលបានសម្តែងការគាំទ្រចំពោះការបន្តការវាយប្រហារលើអ៊ីរ៉ង់ ដោយអះអាងថា សមត្ថភាពនុយក្លេអ៊ែរ និងឃ្លាំងស្តុកមីស៊ីលបាលីស្ទីករបស់ខ្លួន នៅតែជាកង្វល់៕