ប្រមុខយោធាអ៊ីស្រាអែល លោក Eyal Zamir បានធ្វើដំណើរទៅកាន់ភាគខាងត្បូងប្រទេសលីបង់កាលពីថ្ងៃពុធ បន្ទាប់ពីការវាយប្រហារតាមអាកាសថ្មីរបស់អ៊ីស្រាអែលលើគោលដៅលីបង់ ដោយប្រាប់មេបញ្ជាការកងទ័ពថា ពួកគេចាំបាច់ត្រូវបន្តប្រតិបត្តិការគ្មានដែនកំណត់ប្រឆាំងនឹងក្រុមហេសបូឡា។

ការអត្ថាធិប្បាយរបស់លោក បានកើតឡើង នៅពេលដែលទូរទស្សន៍ LBCI របស់លីបង់ បានរាយការណ៍ថា ការចរចាសន្តិភាពជុំទី៣រវាងអ៊ីស្រាអែល និងលីបង់ អាចត្រូវបានធ្វើឡើង នៅទីក្រុងវ៉ាស៊ីនតោន នៅសប្តាហ៍ក្រោយ ទោះបីជាពុំមានការបញ្ជាក់ជាផ្លូវការភ្លាមៗក៏ដោយ។

ទោះបីជាមានការអំពាវនាវរបស់លីបង់ឲ្យបញ្ឈប់ការវាយប្រហារ និងបទឈប់បាញ់ដ៏ផុយស្រួយដែលបានចូលជាធរមានកាលពីខែមុនក៏ដោយ អ៊ីស្រាអែលនៅតែបន្តការវាយប្រហារ។

ក្នុងអំឡុងពេលវាយតម្លៃប្រតិបត្តិការនៅក្នុងតំបន់ Al-Khiam លោក Zamir បាននិយាយថា កងកម្លាំងអ៊ីស្រាអែល នឹងនៅតែដាក់ពង្រាយនៅភាគខាងត្បូងប្រទេសលីបង់ រហូតដល់សន្តិសុខរយៈពេលវែង ត្រូវបានធានាសម្រាប់ប្រជាជននៅភាគខាងជើងប្រទេសអ៊ីស្រាអែល។

លោកក៏បានអះអាងផងដែរថា កងកម្លាំងអ៊ីស្រាអែលបានសម្លាប់យុទ្ធជនហេសបូឡាជាង ២.000នាក់ចាប់តាំងពីការចាប់ផ្តើមនៃអ្វីដែលលោកបានពិពណ៌នាថា ជាយុទ្ធនាការបច្ចុប្បន្នប្រហែលពីរខែកន្លងមកនេះ៕