នៅថ្ងៃព្រហស្បតិ៍ (ទី៧ ខែឧសភា ឆ្នាំ២០២៦) នេះ អតីតរដ្ឋមន្ត្រីការពារជាតិចិន ២រូប គឺលោក Wei Fenghe និងលោក Li Shangfu ត្រូវបានកាត់ទោសប្រហារជីវិតដោយមានការបន្ថយទោសរយៈពេល ២ឆ្នាំ ពាក់ព័ន្ធនឹងការចោទប្រកាន់ពីបទប្រព្រឹត្តអំពើពុករលួយ។

ការកាត់ទោស ចំពោះអ្នកទាំង២ ត្រូវបានប្រកាសដោយឡែកពីគ្នា ដោយតុលាការយោធាចិន។ ទាំងលោក Wei និងលោក Li ក៏ជាអតីតសមាជិកនៃគណៈកម្មការយោធាមជ្ឈិម និងអតីតក្រុមប្រឹក្សារដ្ឋផងដែរ។

យោងតាមសេចក្តីសម្រេចរបស់តុលាការ បានឲ្យដឹងថា លោក Wei ត្រូវបានកាត់ទោសពីបទព្រហ្មទណ្ឌ ជុំវិញការទទួលសំណូក ហើយលោក Li ត្រូវបានកាត់ទោសពីបទល្មើសព្រហ្មទណ្ឌ ជុំវិញទទួលសំណូក និងផ្តល់សំណូក។ ពួកលោកក៏ត្រូវបានដកហូតសិទ្ធិនយោបាយអស់មួយជីវិតផងដែរ ហើយទ្រព្យសម្បត្តិផ្ទាល់ខ្លួនទាំងអស់របស់ពួកលោក នឹងត្រូវបានរឹបអូស។

សេចក្តីសម្រេចរបស់តុលាការ បានបញ្ជាក់ថា ការសម្រាលទោស ឬការលើកលែងទោសបន្ថែមទៀត នឹងមិនត្រូវបានអនុញ្ញាតទេ បន្ទាប់ពីទោសរបស់ពួកលោក ត្រូវបានប្តូរទៅជាការជាប់ពន្ធនាគារអស់មួយជីវិត ស្របតាមច្បាប់ នៅពេលដែលរយៈពេលបន្ថយទោស ២ឆ្នាំផុតកំណត់៕