​តេ​ក្វាន់​ដូ៖ បណ្ដា​ប្រទេស​អាស៊ីអាគ្នេយ៍បាន​ឯកភាព និង​គាំទ្រ​ការប្ដូរឈ្មោះ​កីឡា​តេ​ក្វាន់​ដូ​កូរ៉េខាងជើង ឬ International Taekwondo Federation - ITF មកជា “​កីឡា​យុទ្ធ​គុន​កូរ៉េ​” វិញសម្រាប់​ការប្រកួត​កីឡា​ស៊ី​ហ្គេមឆ្នាំ​២០២៣ នៅ​កម្ពុជា។​

​នេះ​បើតាម​ការបញ្ជាក់​របស់​ឯកឧត្តម វ៉ា​ត់ ចំរើន អគ្គលេខាធិការ​គណៈកម្មាធិកា​រ​ជាតិ​រៀបចំ​ការប្រកួត​កីឡា​ស៊ី​ហ្គេម លើក​ទី​៣២ ឆ្នាំ​២០២៣ (CAMSOC) និង​ជា​អគ្គលេខាធិការ​គណៈកម្មាធិកា​រ​ជាតិ​អូឡាំពិក​កម្ពុជា ​(NOCC) ក្រោយ​បញ្ចប់​កិច្ចប្រជុំ​ក្រុមប្រឹក្សា​សហព័ន្ធ​កីឡា​អាស៊ីអាគ្នេយ៍ នៅ​ខេត្តសៀមរាបកាលពី​ចុង​សប្ដាហ៍​កន្លងទៅ។​ ​ឯកឧត្តម វ៉ា​ត់ ចំរើន មានប្រសាសន៍ថា សម្រាប់​ស៊ី​ហ្គេមឆ្នាំ​២០២៣ កីឡា​តេ​ក្វាន់​ដូ ITF ត្រូវបាន​អង្គប្រជុំ​ឯកភាព និង​គាំទ្រ​ការប្ដូរឈ្មោះ​មកជា “​កី​ឡ​យុទ្ធ​គុន​កូរ៉េ ឬ Martial Art Korea” វិញដើម្បី​ចៀសវាង​ជាន់​ឈ្មោះ​តេ​ក្វាន់​ដូ​ដូចគ្នាជាមួយ​តេ​ក្វាន់​ដូ​កូរ៉េខាងត្បូង ឬ World Taekwondo Federation-WTF។ ​ការគូសបញ្ជាក់​របស់​រដ្ឋលេខាធិការ​ក្រសួងទេសចរណ៍​នេះ បន្ទាប់ពី​កម្ពុជាបានកំណត់​ប្រភេទ​កីឡា​តេ​ក្វាន់​ដូ​ទាំងពីរក្នុងចំណោម​កីឡា ៣៩​ប្រភេទដែល​ត្រូវ​បានអនុម័ត​ដាក់​ក្នុង​កម្មវិធី​ប្រកួត​កីឡា​ស៊ី​ហ្គេមឆ្នាំ​២០២៣ ជា​ផ្លូវការ តាមរយៈ​កិច្ចប្រជុំ​ក្រុមប្រឹក្សា​សហព័ន្ធ​កីឡា​អាស៊ីអាគ្នេយ៍លើកដំបូង​នៅ​កម្ពុជាកាលពី​ថ្មីៗ។​

​សូមបញ្ជាក់ថា កិច្ចប្រជុំ​ក្រុមប្រឹក្សា​សហព័ន្ធ​កីឡា​អាស៊ីអាគ្នេយ៍បានធ្វើ​ឡើង ៣​ថ្ងៃពីថ្ងៃ​ទី​០៨ ដល់​ថ្ងៃទី​១០ ខែមេសា និង​បញ្ចប់​ដោយ​ជោគជ័យដោយ​ប្រតិភូ​ចូលរួម​ទាំងអស់ បាន​សម្ដែង​ការពេញចិត្តចំពោះ​ការរៀបចំ និង​ទទួល​បដិសណ្ឋារកិច្ចរ​បស់​កម្ពុជា ពិសេស​ការត្រៀមខ្លួន​ធ្វើជា​ម្ចាស់ផ្ទះ​ព្រឹត្តិការណ៍​ជា​ប្រវត្តិសាស្ដ្រនា​ឆ្នាំ​២០២៣ ក្រោម​ការរៀបចំ​នយោបាយ​ដឹកនាំ​បានល្អ និង​គោរព​តាម​អនុសាសន៍​ដ៏​ខ្ពង់ខ្ពស់​របស់​សម្ដេច​តេ​ជោ ហ៊ុន សែន នាយករដ្ឋមន្ដ្រី​នៃ​កម្ពុជា។ លើសពីនេះ ប្រតិភូ​ទាំងអស់ក៏បាន​កោត​ស្ញើប​ស្ញែងចំពោះ​ការរៀបចំ និង​អភិវឌ្ឍន៍​ផ្លូវ​ថ្មី​នៅ​ក្រុង​សៀមរាប និង​តំបន់​អង្គរ​ថែម​ទៀតផង៕

​អត្ថបទ៖ លី ឈុន​ឡា