រដ្ឋមន្ត្រីការបរទេសអាមេរិក លោក Marco Rubio បានធ្វើដំណើរទៅដល់បុរីវ៉ាទីកង់ហើយ នៅថ្ងៃព្រហស្បតិ៍ (ទី៧ ខែឧសភា ឆ្នាំ២០២៦) នេះ មុនមានកិច្ចប្រជុំ នៅបុរីវ៉ាទីកង់ និងជំនួបជាមួយមន្ត្រីអ៊ីតាលី។

យន្ដហោះរបស់លោក Rubio បានចុះចតនៅអាកាសយានដ្ឋាន Ciampino ក្រោមការរឹតបន្តឹងសន្តិសុខយ៉ាងតឹងរ៉ឹង មុនពេលធ្វើដំណើរទៅកាន់បុរីវ៉ាទីកង់។ នេះបើយោងតាមសារព័ត៌មាន ANSA។

ដោយមានអមដំណើរដោយឯកអគ្គរដ្ឋទូតអាមេរិក ប្រចាំបុរីវ៉ាទីកង់ លោក Brian Burch លោក Rubio ត្រូវបានស្វាគមន៍នៅបុរីវ៉ាទីកង់ដោយមន្ត្រីវិហារកាតូលិក គឺបព្វជិត Petar Rajic ដែលជាអភិបាលនៃគ្រួសារសម្តេច ប៉ាប មុនពេលចូលទៅក្នុងវិមាន Apostolic ដើម្បីគាល់សម្តេច ប៉ាប Leo XIV (ប៉ាប ឡេអូ ទី១៤)។

កិច្ចប្រជុំបិទទ្វារ រវាងសម្តេច ប៉ាប និងលោក Rubio ត្រូវបានគេរំពឹងថា នឹងមានរយៈពេលប្រហែលកន្លះម៉ោង។ ហើយបន្ទាប់មក លោក Rubio នឹងជួបជាមួយមន្ត្រីការទូតជាន់ខ្ពស់របស់បុរីវ៉ាទីកង់ គឺបព្វជិតសញ្ជាតិអ៊ីតាលី Pietro Parolin។

លោក Rubio ក៏ត្រូវបានគេរំពឹងថា នឹងមានកិច្ចពិភាក្សា នៅថ្ងៃសុក្រ នៅឯ Palazzo Chigi ដែលជាការិយាល័យរបស់ លោកស្រីនាយករដ្ឋមន្ត្រីអ៊ីតាលី Giorgia Meloni។ ដំណើរទស្សនកិច្ចនេះកើតឡើងចំពេលមានកិច្ចខិតខំប្រឹងប្រែងផ្នែកការទូតដែលកំពុងបន្តមាន ពាក់ព័ន្ធនឹងសហរដ្ឋអាមេរិក អឺរ៉ុប និងបុរីវ៉ាទីកង់ ជុំវិញបញ្ហាសន្តិសុខអន្តរជាតិ និងភូមិសាស្ត្រនយោបាយ៕