បុគ្គល ៣នាក់ដែលស្និទ្ធនឹងប្រធានាធិបតីប្រេស៊ីលបានប្រាប់សារព័ត៌មាន Reuters ថា មេដឹកនាំប្រេស៊ីល លោក Luiz Inacio Lula da Silva ទៅទស្សនកិច្ចនៅសេតវិមាន នាថ្ងៃព្រហស្បតិ៍ (ទី៧ ខែឧសភា ឆ្នាំ២០២៦) នេះ ដោយមានគោលបំណង ដើម្បីធ្វើឲ្យមានភាពរស់រវើកឡើងវិញនូវអ្វីដែលប្រធានាធិបតីអាមេរិក លោក Donald Trump កាលពីឆ្នាំមុន បានហៅថា «ការត្រូវរ៉ូវគ្នាដ៏ល្អឥតខ្ចោះ» រួចផុតពីអត្រាពន្ធថ្មី និងបង្ហាញពីឆន្ទៈ ក្នុងការចរចាកិច្ចព្រមព្រៀង ស្ដីពីរ៉ែសំខាន់ៗ និងបញ្ហាឧក្រិដ្ឋកម្មធំៗ។

មន្ត្រីប្រេស៊ីលម្នាក់ដែលពាក់ព័ន្ធនឹងការរៀបចំកិច្ចប្រជុំនេះ បានប្រាប់សារព័ត៌មាន Reuters ថា៖ «យើងមិនដឹងថា ដំណើរទស្សនកិច្ចនេះ នឹងជួយអ្វីបានដែរ ឬអត់នោះទេ។ ប៉ុន្តែវាគ្រាន់បើជាងយើងមិនបានធ្វើអ្វីសោះ»។

គួរបញ្ជាក់ថា កាលពីឆ្នាំមុន លោក Trump បានផ្ដល់ផលប៉ះពាល់យ៉ាងខ្លាំងដល់ផលិតផលប្រេស៊ីល ដោយការដាក់អត្រាពន្ធ ៥០ភាគរយ ដែលជាកម្រិតពន្ធខ្ពស់បំផុតជាងគេដែលសហរដ្ឋអាមេរិកបានដាក់ លើការនាំចូល ដោយចោទប្រកាន់ប្រទេសនេះថា បានជំរុញយុទ្ធនាការធ្វើទុកបុកម្នេញខាងនយោបាយ ប្រឆាំងនឹងអតីតប្រធានាធិបតីស្តាំនិយមជ្រុល លោក Jair Bolsonaro ដែលក្រោយមកត្រូវបានកាត់ទោសពីបទប៉ុនប៉ងផ្តួលរំលំលទ្ធិប្រជាធិបតេយ្យ។

ក្រោយមក លោក Trump បានដកពន្ធភាគច្រើន ក្នុងនោះរួមទាំងសាច់គោ និងកាហ្វេរបស់ប្រេស៊ីល យ៉ាងហោចណាស់មួយផ្នែក ដើម្បីជួយទម្លាក់តម្លៃគ្រឿងទេសរបស់សហរដ្ឋអាមេរិកដែលកំពុងកើនឡើង។ កាលពីខែកុម្ភៈ តុលាការកំពូលសហរដ្ឋអាមេរិក បានសម្រេចលុបចោលវិធានការពន្ធគយសកលដែលលោកបានដាក់ក្រោមច្បាប់គ្រាអាសន្នជាតិ ដោយដកចេញនូវកាតព្វកិច្ចពន្ធជាច្រើនដែលនៅសល់។

ផលិតផលប្រេស៊ីលនៅតែប្រឈមជាមួយអត្រាពន្ធបន្ថែម ១០ភាគរយ ដែលត្រូវផុតកំណត់នៅខែកក្កដា។ ប៉ុន្តែក្នុងរយៈពេលប៉ុន្មានសប្តាហ៍ថ្មីៗនេះ ប្រេស៊ីលបានឃើញសញ្ញាថា ការនាំចេញរបស់ខ្លួនអាចនឹងត្រូវរងផលប៉ះពាល់ដោយសារពន្ធថ្មីដែលទាក់ទងនឹងការស៊ើបអង្កេតមាត្រា៣០១ ពាក់ព័ន្ធនឹងការអនុវត្តពាណិជ្ជកម្មអយុត្តិធម៌៕