រដ្ឋមន្រ្តីការបរទេសបារាំងលោក Jean-Noel Barrot និយាយថា នាវាផ្ទុកយន្តហោះចម្បាំងបារាំង ដែលត្រូវបានបញ្ជូនទៅជិតច្រកសមុទ្រ Hormuz គឺដើម្បីរួមចំណែកលទ្ធភាពនៃបេសកកម្មការពារជាតិ ក្នុងពេលដ៏ខ្លីខាងមុខនេះ ពេលដែលភាពស្ងប់ស្ងាត់ត្រូវបានស្តាឡើងវិញហើយនោះ ។

 គួរឲ្យដឹងថា បារាំងបានបញ្ជូននាវាផ្ទុកយន្តហោះចម្បាំង Charles de Gaulle និងក្រុមវាយប្រហារទៅកាន់សមុទ្រក្រហម កាលពីថ្ងៃពុធ ដែលជាផ្នែកមួយនៃផែនការសម្រាប់បេកកម្មដ៏មានសក្តានុពល ដើម្បីធានាសុវត្ថិភាពច្រកសមុទ្រ ។

 ការបាញ់ប្រហារថ្មីកាលពីថ្ងៃចន្ទ គូសបញ្ជាក់ពីហានិភ័យ ពេលដែលសហរដ្ឋអាមេរិក និងអ៊ីរ៉ង់ ប្រឹងប្រែងគ្រប់គ្រងច្រកសមុទ្រដ៏តូចចង្អៀតមួយនេះ ដែលជាសរសៃឈាមដ៏ចាំបាច់មួយសម្រាប់ថាមពលនិងពាណិជ្ជកម្មសកល ធ្វើឲ្យរង្គោះរង្គើរដល់បទឈប់បាញ់ដ៏ផុយស្រួយរយៈពេល ៤សប្តាហ៍ និងពង្រឹងការបិទផ្លូវសមុទ្ររបស់គូប្រជែង ។

 បារាំង និងអង់គ្លេស បាននឹងកំពុងធ្វើការលើសំណើអស់រយៈពេលជាច្រើនសប្តាហ៍មកហើយ ដែលមានគោលបំណងដាក់ចេញគ្រឹះសម្រាប់ការឆ្លងកាត់ដោយសុវត្ថិភាពតាមច្រកសមុទ្រ Hormuz ពេលដែលស្ថានភាពមានស្ថិរភាពឡើងវិញ ឬជម្លោះត្រូវបានដោះស្រាយហើយនោះ ។

 កងទ័ពបារាំងនិយាយនៅក្នុងសេចក្តីថ្លែងការណ៍ថា នាវាផ្ទុកយន្តហោះ Charles de Gaulle ដែលអមដំណើរដោយនាវាចម្បាំងអ៊ីតាលី និងហូឡង់ ស្ថិតនៅតាមផ្លូវទៅកាន់តំបន់ភាគខាងត្បូងសមុទ្រក្រហម ៕