យានដ្រូន ២គ្រឿងដែលបានហោះចូលប្រទេសឡាតវី ចេញពីទឹកដីរុស្ស៊ី ហើយនិងធ្លាក់នៅថ្ងៃព្រហស្បតិ៍នេះ បានបង្កើនអារម្មណ៍អសន្តិសុខបន្ថែមទៀត នៅក្នុងចំណោមពលរដ្ឋឡាតវី ដែលមានអារម្មណ៍ថារងការគំរាមកំហែងរួចទៅហើយ បន្ទាប់ពីការឈ្លានពានយានដ្រូនលើកមុនចូលដែនអាកាសរបស់ប្រទេសដែលជាសមាជិកអង្គការណាតូមួយនេះ ។

លោក Sadovskis Jevgenijs គឺជាអ្នកស្រុកម្នាក់ និយាយថា មនុស្សមានអារម្មណ៍ថារងការគំរាមកំហែង ក្រោយពីរូបលោកទូរស័ព្ទប្រាប់ដល់ពួកគេពីហេតុការណ៍ធ្លាក់យានដ្រូន ។

លោកថា ពួកគេមួយចំនួនមានអារម្មណ៍ខឹងសម្បារខ្លាំងណាស់ ហើយពួកគេមួយចំនួនទៀត ក៏មានអារម្មណ៍ព្រួយបារម្ភផងដែរ ។

អ្នកស្រី Elizabete Zojeva គឺជាពលរដ្ឋមួយរូបទៀតនិយាយដែរថា មាននូវសំឡេងរបស់យានដ្រូន ហើយគាត់ខ្លាចណាស់ពេលមើលឃើញយានដ្រូនបែបនេះ ប៉ុន្តែគាត់មិនអាចធ្វើបានឡើយ ក្រៅពីមើលវាតាមបង្អួចផ្ទះ ។

នគរបាលជាតិឡាតវីនិយាយថា យានដ្រូនមួយគ្រឿង បានធ្លាក់នៅទីតាំងផ្ទុកប្រេងមួយកន្លែង នៅទីក្រុង Rezekne ស្ថិតនៅភាគខាងកើតប្រទេស ។ អគ្គិភ័យបានឆាបឆេះ ប៉ុន្តែត្រូវបានគ្រប់គ្រងភ្លាមៗ ដោយអ្នកពន្លត់អគ្គិភ័យ ។ 

កងទ័ពឡាតវីនិយាយដែរថា ដរាបណាការឈ្លានពានរបស់រុស្ស៊ីប្រឆាំងនឹងអ៊ុយក្រែន នៅតែបន្ត វាអាចទៅរួចដែលឧប្បត្តិហេតុបែបនេះ នឹងកើតឡើងម្តងទៀត នៅពេលដែលយានដ្រូនបរទេសចូលទៅក្នុងដែនអាកាសឡាតវី ៕