បារ៉ែន និងអារ៉ាប់រួម បានជំរុញឲ្យក្រុមប្រឹក្សាសន្តិសុខអង្គការសហប្រជាជាតិ(UN) ចាត់វិធានការលើអ្វីដែលពួកគេចាត់ទុកថាជាការវាយប្រហារយានដ្រូន និងមីស៊ីលខុសច្បាប់របស់អ៊ីរ៉ង់ដែលមានគោលដៅលើអារ៉ាប់រួម និងការដឹកជញ្ជូនក្នុងច្រកសមុទ្រ Hormuz ។

 ថ្លែងនៅទីស្នាក់ការកណ្តាល UN ស្ថិតក្នុងបុរីញូវយ៉ក ឯកអគ្គរាជ្យទូតបារ៉ែនប្រចាំនៅ UN លោក Jamal Fares Alrowaiei និយាយថា ការវាយប្រហារលើអារ៉ាប់រួម ស្មើនឹងក្តីកង្វល់រួម និងបន្ទាន់ សម្រាប់បារ៉ែន និងតំបន់ទាំងមូល ។

 លោកថា ការវាយប្រហារខុសច្បាប់ទាំងនេះ គឺជាការបំពានយ៉ាងច្បាស់ក្រឡែតលើសេចក្តីសម្រេច លេខ ២៨១៧ របស់ក្រុមប្រឹក្សាសន្តិសុខ ។

 ដោយឡែក ឯកអគ្គរាជ្យទូតអារ៉ាប់រួមប្រចាំនៅ UN លោក Mohamed Abushahab និយាយដែរថា អ្វីដែលកើតឡើងនៅច្រកសមុទ្រ Hormuz មិនស្ថិតនៅច្រកសមុទ្រ Hormuz នោះទេ ។ វាធ្វើឲ្យប៉ះពាល់ដល់ទីផ្សារថាមពល ខ្សែចង្វាក់ផ្គត់ផ្គង់ តម្លៃទំនិញ និងស្ថិរភាពសេដ្ឋកិច្ចនៅទូទាំងសកលលោក ។

 គួរឲ្យដឹងថា សមាជិកក្រុមប្រឹក្សាសន្តិសុខ UN បានចាប់ផ្តើមជំនួបបិទទ្វារកាលពីថ្ងៃអង្គារ ស្តីពីសេចក្តីសម្រេច ព្រាងច្បាប់ដោយសហរដ្ឋអាមេរិក ក្នុងនោះបារ៉ែន អារ៉ាប៊ីសាអ៊ូឌីត អារ៉ាប់រួម គូវ៉ែត និងកាតា ទាមទារឲ្យអ៊ីរ៉ង់បញ្ឈប់ការវាយប្រហារ និងការដាក់មីននៅក្នុងច្រកសមុទ្រ Hormuz ។

 បើសិនជាសេចក្តីសម្រេចមួយនេះ ត្រូវបានអនុម័ត វានឹងនាំឲ្យមានទណ្ឌកម្មលើអ៊ីរ៉ង់ និងអនុញ្ញាតឲ្យមានកងកម្លាំង ក្នុងករណីដែលអ៊ីរ៉ង់មិនបញ្ឈប់ការវាយប្រហាររបស់ពួកគេ និងការគំរាមកំហែងដល់ការដឹកជញ្ជូនពាណិជ្ជកម្ម ៕