អង្គការសុខភាពពិភពលោក(WHO) បានអំពាវនាវឲ្យមានការវិនិយោគបន្ថែមទៀតលើកម្លាំងការងារសុខភាពនៅអាហ្រ្វិក ក្រោយករណីឆ្លងវីរុស Hanta ត្រូវបានរាយការណ៍ថាកើតមាននៅលើនាវាកម្សាន្តដែលធ្វើដំណើរចេញពីអាមេរិកខាងត្បូង ទៅកាន់អាហ្វ្រិកខាងលិច ។

 នាវាកម្សាន្តមួយគ្រឿង បានចាកចេញពីប្រទេសអាហ្សង់ទីន ឆ្ពោះទៅកាន់ប្រទេសកោះកាប់វើដ ជាទីដែលការរីករាលដាលឆ្លងវីរុស Hanta កើតឡើង ។

 នាវាកម្សាន្តប្រណីតមួយគ្រឿងនេះដែលបានបោះយុថ្កានៅជិតតំបន់ឆ្នេរកាប់វើដ ចាប់តាំងពីថ្ងៃអាទិត្យមកម្ល៉េះនោះ បានចាកចេញទៅកាន់ប្រជុំកោះ Canary របស់អេស្ប៉ាញ កាលពីថ្ងៃពុធ ។

 ថ្លែងក្នុងសន្និសីទសារព័ត៌មាននៅទីក្រុង Accra ប្រទេសហ្គាណា លោកវេជ្ជបណ្ឌិត Mohamed Janabi គឺជាប្រធានប្រចំាតំបន់អាហ្វ្រិករបស់អង្គការ WHOនិយាយថា អាហ្វ្រិករងផលប៉ះពាល់ដោយផ្ទាល់ ក្នុងនោះ ករណីធ្ងន់ធ្ងរ ត្រូវបានព្យាបាលក្នុងបន្ទប់សង្រ្គោះបន្ទាន់នៅអាហ្វ្រិកខាងត្បូង ។

 លោកថា ស្ថានភាពបែបនេះ គូសបញ្ជាក់ពីតម្រូវការសម្រាប់ការឆ្លើយតបសកល និងប្រព័ន្ធសុខភាពខ្លាំងជាងមុន ។

 អង្គការ WHO និយាយថា ក្រុមសង្គ្រោះបន្ទាន់ បានជម្លៀសមនុស្ស ៣នាក់ មានសមាជិកនាវិកធ្លាក់ខ្លួនឈឺ ២នាក់ និងមនុស្សម្នាក់ផ្សេងទៀតដែលបានប៉ះពាល់ជាមួយករណីដែលត្រូវបានបញ្ជាក់ ចេញពីនាវា ដែលបានចាកចេញពីកំពង់ផែនៅជិតប្រទេសកោះកាប់វើដ ហើយក្រោយមក អ្នកដែលត្រូវបានជម្លៀសទាំង ៣នាក់ បានឡើងជិះយន្តហោះនៅអាកាសយានដ្ឋានកាប់វើដ ។

 មន្ត្រីសុខភាព បាននិយាយសម្រាលពីការព្រួយបារម្ភនៃការផ្ទុះឡើងជាសកលកាន់តែខ្លាំងរបស់វីរុសមួយនេះថា វាមិនសូវឆ្លងដូចជាជំងឺ COVID នោះទេ វាមិនដូចជំងឺរាតត្បាត COVID-19 នោះទេ ពីព្រោះថា ហានិភ័យរីករាលដាល់ឆ្លងទូទាំងពិភពលោក នៅមានកម្រិតទាបនៅឡើយ ៕