អង្គការសហប្រជាជាតិ(UN) បានអំពាវនាវឲ្យមានការការពារជនស៊ីវិល និងហេដ្ឋារចនាសម្ព័ន្ធស៊ីវិល ស្របពេលដែលការវាយប្រហារ និងការបញ្ជាឲ្យជម្លៀសខ្លួនរបស់អ៊ីស្រាអែល ធ្វើឲ្យប៉ះពាល់តំបន់ជាច្រើននៅប្រទេសលីបង់ ។

 អ្នកនាំពាក្យ UN លោក Stephane Dujarric និយាយថា UN មានការព្រួយបារម្ភជាខ្លាំងចំពោះការបញ្ជាឲ្យជម្លៀសខ្លួន ហើយនិងការវាយប្រហារតាមច្រកអាកាសលើទីក្រុងជាច្រើនរបស់លីបង់ រួមទាំងទីក្រុង Nabatieh, Bekaa, Saida និងទីក្រុង West Bekaa ។

 លោក Dujarric និយាយប្រាប់ក្រុមអ្នកសារព័ត៌មាននៅទីស្នាក់ការកណ្តាល UNថា ជាថ្មីម្តងទៀត ពួកយើងសូមបញ្ជាក់ថា ជនស៊ីវិល ហេដ្ឋារចនាសម្ព័ន្ធស៊ីវិល ត្រូវតែគោរព និងត្រូវតែការពារគ្រប់ពេលវេលាទាំងអស់។

 UN បានលើកឡើងផងដែរក្តីបារម្ភចំពោះការវាយប្រហារធ្វើឲ្យប៉ះពាល់ដល់ក្រុមការងារសុខភាព និងមណ្ឌលសុខភាពនៅលីបង់ ។ 

 ទីភ្នាក់ងារមនុស្សធម៌ និយាយថា ក្រុមសង្រ្គោះបន្ទាន់ និងសេវាកម្មសុខភាព កំពុងស្ថិតក្រោមសម្ពាធ ស្របពេលដែលអំពើហិង្សានៅតែបន្ត ធ្វើឲ្យស្ថានភាពមនុស្សធម៌កាន់តែធ្ងន់ធ្ងរខ្លាំង សម្រាប់ពលរដ្ឋដែលបានជម្លៀសខ្លួនរួចទៅហើយដោយសារជម្លោះ ។

 គួរឲ្យដឹងថា កាលពីថ្ងៃពុធម្សិលមិញ អ៊ីស្រាអែល បានវាយប្រហារទីក្រុងបេរូតជាលើកដំបូងចាប់តាំងពីបានយល់ព្រមលើបទឈប់បាញ់ជាមួយក្រុមហេសបូឡាកាលពីខែមុន ដោយអ៊ីស្រាអែល និយាយថា ខ្លួនបានដាក់គោលដៅលើទីបញ្ជាការកងកម្លាំង Radwanរបស់ក្រុមសកម្មប្រយុទ្ធនេះ ក្នុងតំបន់ជាយក្រុងភាគខាងត្បូង និងបានបណ្ដាលឲ្យមនុស្សមួយចំនួនស្លាប់ ៕