ស្ត្រីអូស្ត្រាលី ៣ នាក់ ត្រូវបានបដិសេធមិនឲ្យនៅក្រៅឃុំ នៅពេលដែលពួកគេបង្ហាញខ្លួននៅក្នុងតុលាការនៅថ្ងៃសុក្រនេះ ដោយត្រូវបានចោទប្រកាន់ពីបទប្រព្រឹត្តអំពើទាសភាព និងភេរវកម្ម បន្ទាប់ពីពួកគេ បានត្រឡប់មកផ្ទះវិញពីប្រទេសស៊ីរី ជាមួយនឹងមនុស្ស ១០នាក់ ផ្សេងទៀត ដែលនគរបាលអះអាងថា មានទំនាក់ទំនងជាមួយក្រុមរដ្ឋអ៊ីស្លាមដេស ( Daesh)។

ស្ត្រីទាំង ៤នាក់ និងកុមារ ៩នាក់ ដែលបានចំណាយពេលជាច្រើនឆ្នាំ នៅក្នុងជំរំ Roj នៅវាលខ្សាច់ស៊ីរី បានធ្វើដំណើរដោយជើងហោះហើរចំនួនពីររបស់ក្រុមហ៊ុន Qatar Airways ពីទីក្រុងដូហា កាលពីថ្ងៃព្រហស្បតិ៍ ទោះបីជារដ្ឋាភិបាលអូស្ត្រាលី បានព្រមានថា ពួកគេនឹងប្រឈមមុខនឹងការចោទប្រកាន់ ប្រសិនបើពួកគេត្រឡប់មកវិញក៏ដោយ។

នគរបាលបាននិយាយនៅក្នុងសេចក្តីថ្លែងការណ៍មួយថា លោកស្រី Kawsar Abbas អាយុ ៥៣ឆ្នាំ និងកូនស្រីរបស់ខ្លួនឈ្មោះ Zeinab Ahmed អាយុ ៣១ឆ្នាំ ត្រូវបានចោទប្រកាន់នៅក្នុងតុលាការទីក្រុងមែលប៊ន ទាក់ទងនឹងការចោទប្រកាន់ថា ក្រុមគ្រួសាររបស់ពួកគេ បានទិញទាសករស្ត្រី Yazidi ម្នាក់ ក្នុងតម្លៃ ១០.០០០ដុល្លារ។

មេធាវីរបស់ពួកគេ បាននិយាយថា ពួកគេនឹងដាក់ពាក្យសុំឲ្យស្ត្រីទាំងពីរត្រូវបានដោះលែងឲ្យនៅក្រៅឃុំនៅថ្ងៃចន្ទ។ ស្ត្រីទាំងពីរនាក់ មិនបាននិយាយអ្វីទេ ក្នុងអំឡុងពេលបង្ហាញខ្លួននៅតុលាការរយៈពេលខ្លីរបស់ពួកគេ។ ការដោះលែងឲ្យនៅក្រៅឃុំ ត្រូវបានបដិសេធជាផ្លូវការ៕