មេដឹកនាំនៃបណ្ដាប្រទេសតំបន់អាស៊ីអាគ្នេយ៍ដែលរៀបចំកិច្ចប្រជុំកំពូល នៅថ្ងៃសុក្រ (ទី៨ ខែឧសភា ឆ្នាំ២០២៦) នេះ ត្រូវបានគេរំពឹងថា នឹងពិភាក្សាយ៉ាងល្អិតល្អន់ អំពីការឆ្លើយតបដែលមានការស្រុះស្រួលគ្នា ចំពោះផលប៉ះពាល់ ដោយសារវិបត្តិ នៅតំបន់មជ្ឈិមបូព៌ា ខណៈដែលថ្នាក់ដឹកនាំទាំងអស់មានគោលបំណងបន្ធូរបន្ថយសម្ពាធ ពីបញ្ហាថាមពលភ្លាមៗ ជាអ្វីដែលបានធ្វើឲ្យសេដ្ឋកិច្ចពឹងផ្អែកលើការនាំចូលប្រេងរបស់ប្លុកនេះរង្គោះរង្គើ។

អំឡុងកិច្ចប្រជុំ នៅកោះសេប៊ូ (Cebu) របស់ប្រទេសហ្វីលីពីន បណ្ដាមេដឹកនាំនៃសមាគមប្រជាជាតិអាស៊ីអាគ្នេយ៍ ឬអាស៊ាន (ASEAN) ត្រូវបានគេរំពឹងថា នឹងជំរុញឲ្យមានយុទ្ធសាស្ត្រសុខដុមរមនា ដើម្បីធានាសន្តិសុខថាមពល និងស្បៀងអាហារ នៅក្នុងតំបន់ដែលងាយរងគ្រោះជាពិសេស ដោយសារការបិទអស់រយៈពេលជិត ៧០ថ្ងៃហើយ ចំពោះច្រកសមុទ្រដ៏សំខាន់ គឺ Hormuz។

នៅក្នុងសុន្ទរកថាបើក ក្នុងនាមជាប្រធានអាស៊ាន ប្រធានាធិបតីហ្វីលីពីន លោក Ferdinand Marcos Jr បាននិយាយថា អាស៊ានកំពុងឈរជាមួយគ្នា ដើម្បីបង្ហាញពីសមត្ថភាពរបស់ខ្លួនក្នុងការឆ្លើយតប ប្រកបដោយឯកភាព និងការតាំងចិត្ត ប៉ុន្តែត្រូវតែមានភាពបត់បែន និងរហ័សរហួន។

លោកបានបញ្ជាក់ថា៖ «យើងត្រូវតែធានាសន្តិសុខថាមពល និងភាពធន់ក្នុងតំបន់។ នៅពេលមានភាពប្រែប្រួលខ្ពស់ អាស៊ានត្រូវតែពង្រឹងការសម្របសម្រួល និងលើកកម្ពស់ការត្រៀមខ្លួនបន្ថែមទៀត ធ្វើការលើវិធានការរួមជាក់ស្តែង ដើម្បីការពារការផ្គត់ផ្គង់ថាមពលដែលមានស្ថិរភាព និងធ្វើឲ្យការតភ្ជាប់គ្នាទៅវិញទៅមកកាន់តែប្រសើរឡើង»។

តំបន់នេះ ដែលមានប្រជាជនជិត ៧០០លាននាក់ និងសេដ្ឋកិច្ចតម្លៃសរុប ៣,៨សែនកោដិដុល្លារ ប្រឈមនឹងហានិភ័យធំៗ ដោយសារផលវិបាកពីសង្គ្រាមអ៊ីរ៉ង់ ហើយហ្វីលីពីន ដែលស្ថិតក្នុងចំណោមប្រទេសដំបូងគេជាច្រើន នៅលើពិភពលោកប្រកាសអាសន្នថាមពលនោះ បានជំរុញឲ្យមានការអនុម័តកិច្ចព្រមព្រៀងក្របខ័ណ្ឌចែករំលែកប្រេងអាស៊ានដោយស្ម័គ្រចិត្ត និងផ្អែកលើពាណិជ្ជកម្ម។

បណ្ដាមេដឹកនាំអាស៊ាន នឹងធ្វើកិច្ចប្រជុំឯកជនមួយ នៅថ្ងៃសុក្រនេះ ហើយត្រូវបានគេរំពឹងថា នឹងអំពាវនាវឲ្យមានដំណោះស្រាយទទួលយកបានពីភាគីទាំង២ រវាងសហរដ្ឋអាមេរិក និងអ៊ីរ៉ង់ ក៏ដូចជាការបើកច្រកសមុទ្រ Hormuz ឡើងវិញ ដែលជាផ្លូវទឹក សម្រាប់នាវាប្រហែល ១៣០គ្រឿង ក្នុងមួយថ្ងៃ និង ១ភាគ៥នៃការផ្គត់ផ្គង់ប្រេង និងឧស្ម័នរបស់ពិភពលោក មុនពេលជម្លោះផ្ទុះឡើង៕