រោងចក្រចម្រាញ់ប្រេងធំបំផុតរបស់ប្រទេសលីប៊ីនៅតំបន់ Zawiya ត្រូវបានបិទទ្វារ និងប្រកាសគ្រាអាសន្ន បន្ទាប់ពីការប្រយុទ្ធគ្នារវាងក្រុមប្រដាប់អាវុធដែលនៅក្បែរនោះ។ សាជីវកម្មប្រេងជាតិ (NOC) និងក្រុមហ៊ុនចម្រាញ់ប្រេង Zawiya បានប្រកាសពី ការផ្អាកប្រតិបត្តិការជាការប្រុងប្រយ័ត្នជាមុន និងបានជម្លៀសបុគ្គលិកចេញពីរោងចក្រប្រេង និងកំពង់ផែ។

សាជីវកម្មប្រេងជាតិ (NOC) បានបញ្ជាក់ពីសុវត្ថិភាពរបស់បុគ្គលិកទាំងអស់ និងបាននិយាយបន្ថែមថាការផ្គត់ផ្គង់ប្រេងឥន្ធនៈនឹងបន្តដូចធម្មតា។ សេចក្តីថ្លែងការណ៍នៅលើបណ្តាញសង្គមហ្វេសប៊ុក បាននិយាយថា ស៊ីរ៉ែនបានរោទិ៍ឡើងបន្ទាប់ពីមានការប៉ះទង្គិចគ្នាដោយអាវុធធុនធ្ងន់ដែលពាក់ព័ន្ធ បានផ្ទុះឡើងនៅជុំវិញរោងចក្រប្រេង កាលពីថ្ងៃសុក្រ។

ការប៉ះទង្គិចគ្នាទាំងនេះ បានបណ្តាលឱ្យគ្រាប់កាំភ្លើងធុនធ្ងន់ជាច្រើនគ្រាប់ធ្លាក់ទៅលើទីតាំងផ្សេងៗគ្នានៅបរិវេណរោងចក្រប្រេង ប៉ុន្តែពុំមានការខូចខាតធ្ងន់ធ្ងរត្រូវបានរាយការណ៍នោះទេ។ ទោះជាយ៉ាងណា ការប៉ះទង្គិចគ្នាបានកើនឡើងកាន់តែខ្លាំង និងបានរាលដាលដល់តំបន់លំនៅឋានដែលនៅជាប់នឹងរោងចក្រចម្រាញ់ប្រេង ធ្វើឱ្យតំបន់នេះក្លាយជាគោលដៅផ្ទាល់សម្រាប់ការបាញ់ផ្លោង និងបង្កើនហានិភ័យនៃការខូចខាតបន្ថែមទៀត។ អាជ្ញាធរនៅតំបន់ Zawiya ភាគខាងលិចរដ្ឋធានី Tripoli បាននិយាយថា ពួកគេបានចាប់ផ្តើមប្រតិបត្តិការទ្រង់ទ្រាយធំ ប្រឆាំងក្រុមឧក្រិដ្ឋជន។ អាជ្ញាធរបាននិយាយថា ប្រតិបត្តិការនេះដាក់គោលដៅលើ «ទីតាំងលាក់ខ្លួនរបស់ក្រុមឧក្រិដ្ឋជន និងបុគ្គលដែលកំពុងត្រូវបានគេតាមចាប់ខ្លួន» ជាអ្នកជាប់ពាក់ព័ន្ធនឹងករណីធ្ងន់ធ្ងរ ដោយលើកឡើងពី ករណីឃាតកម្ម និងការប៉ុនប៉ងឃាតកម្ម ការចាប់ជំរិត និងការជំរិតទារប្រាក់ ការជួញដូរមនុស្ស គ្រឿងញៀន អាវុធ និងការធ្វើអន្តោប្រវេសន៍ខុសច្បាប់។