ស្ទឹងត្រែង៖ នៅក្នុងស្រុកសេសាន ខេត្តស្ទឹងត្រែង អាជ្ញាធរ បានរៀបចំសង្ក្រាន្តថ្នាំថ្មី ដើម្បីផ្ដល់ភាពសប្បាយរីករាយ ជូនប្រជាពលរដ្ឋ ក្រោយខកខានសប្បាយពីរឆ្នាំហើយ ដោយសារបញ្ហាកូវីដ-១៩។

លោក សុវណ្ណ ពិសេដ្ឋ អភិបាលស្រុកសេសាន បានឱ្យដឹងថា អាជ្ញាធរស្រុក បានកៀរគសប្បុរស ជនក្នុងស្រុក រៀបចំពិធីសង្ក្រាន្ត នៅក្នុងបរិវេណវត្តកំភុន ក្នុងឃុំកំភន់ ដើម្បីឱ្យប្រជាពលរដ្ឋ និងភ្ញៀវ ទេសចរ បានចូលមកលេងកម្សាន្ដអបអរសាទរបុណ្យចូលឆ្នាំថ្មីប្រពៃណីជាតិខ្មែរ ដែលប្រព្រឹត្ត​ទៅ​នៅថ្ងៃទី១៤ ដល់ថ្ងៃទី១៦ ខែមេសានេះ។

លោក បានបញ្ជាក់ថា ការរៀបចំសង្ក្រាន្តអបអរពីធីបុណ្យចូលឆ្នាំថ្មីនេះ ​ជាលើកទី២ហើយ ដែល លើកទី១ ​នៅក្នុងឆ្នាំ២០១៩ ​ព្រោះអាក់ខាន​មិនបានរៀបចំ​ ឆ្នាំ២០២០ ​និង២០២១​ កន្លងមកនេះ ដោយសារតែការរាតត្បាតនៃជំងឺកូវីដ-១៩។

តែនៅឆ្នាំនេះ ដោយសារយុទ្ធសាស្ត្រវ៉ាក់សាំងរបស់រាជរដ្ឋាភិបាល ​ទើបធ្វើឱ្យប្រជាពលរដ្ឋ មាន​ឱកាស​បានជួបជុំសប្បាយរីករាយឡើងវិញ​ ខណៈខេត្តស្ទឹងត្រែង​ ក៏ត្រូវបាន លើកលែង​កាតព្វកិច្ចពាក់ម៉ាស់ផងដែរ។

បើទោះជាមិនទាន់ដល់ថ្ងៃចូលឆ្នាំ តែគេសង្កេតឃើញថា ស្រុកសេសាន​ ខេត្តស្ទឹងត្រែង​ បានទទួល ទេសចរបណ្ដើរៗហើយ ​ដោយសាររាជរដ្ឋាភិបាល ​បានបើកប្រទេស និងបើកដំណើរការតំបន់​ទេសចរណ៍ ​នានាឡើងវិញ៕អត្ថបទ៖ មាស ផល្លា