​បាល់ទាត់៖ ​ក្រុម​ការពារ​តំណែង​ជើងឯក UEFA Champions League តោ​ខៀវ Chelsea បាន​ធ្លាក់​ពី​ការប្រកួត​ត្រឹម​វគ្គ ៨ក្រុម​ចុងក្រោយ​ហើយ​ក្រោយ​ចាញ់ Real Madrid នៅ​ម៉ោង​បន្ថែម​។ ​​បរាជ័យ​ក្នុង​ទឹកដី​ខ្លួនឯង ៣-១ នៅ Stamford Bridge, Chelsea ចាប់ផ្តើម​ជើង​ទី២ នៅ​ទឹកដី Santiago Bernabeu ដោយ​ជំនឿ​ចិត្ត​តាមរយៈ​គ្រាប់​បាល់​នាំមុខ​ដំបូង​របស់ Mason Mount នៅ​នាទី​ទី ១៥​។

​​ឈានចូល​វគ្គ​ទី២ Antonio Rudiger ក៏​តែ​ត​បញ្ចូល​គ្រាប់​នាំមុខ ២-០ នៅ​នាទី​ទី ៥១ មុនពេល​ដែល Timo Werner ស៊ុត​គ្រាប់​នាំមុខ ៣-០ ឱ្យ Chelsea ត្រលប់មក​នាំមុខ ៤-៣ វិញ​សរុប​ទាំងពីរ​ជើង​។ ​​យ៉ាងណាក្តី​កីឡាករ​បម្រុង​ផ្លាស់ប្តូរ​ចូល Rodrygo គឺជា​អ្នក​តាម​ស្មើ ៤-៤ វិញ​ឱ្យ Real Madrid មុនពេល​ដែល Karim Benzema តែ​ត​បញ្ចូល​ទី​គ្រាប់​ជ័យជំនះ​នៅ​ម៉ោង​បន្ថែម​នាទី​ទី ៩៦​។ ​​អ្នកចាត់ការ Chelsea លោក Thomas Tuchel និយាយថា គ្មានអ្វី​ត្រូវ​សោកស្តាយ​ទេ Chelsea គ្រាន់តែ​គ្មាន​សំណាង​ប៉ុណ្ណោះ កីឡាករ​ក្នុង​ក្រុម​បានបង្ហាញ​ពី​ស្មារតី​តស៊ូ ការលេង​ដ៏​ត្រឹមត្រូវ​មួយ​។

​​ចំណែក​លោក Carlo Ancelotti វិញ​និយាយ​ថា ក្រោយ​ការនាំ​មុខ ២-០ របស់ Chelsea ធ្វើឱ្យ​ក្រុម​របស់លោក​បាត់អស់​ជំនឿ​ចិត្ត តែ​អរគុណ​អ្នកគាំទ្រ​នៅ​ពីក្រោយ​ដែល​ធ្វើឱ្យ Real Madrid ត្រលប់មក​យកឈ្នះ​វិញ​បាន​។​ ​​ក្រុម​របស់លោក Carlo Ancelotti នឹង​បន្ត​ជួប​ជាមួយ​អ្នកឈ្នះ​រវាង Atletico Madrid រឺ Manchester City រាត្រី​នេះ​៕

​អត្ថបទ​៖​នាង សុភា​វុ​ធ