ភ្នំពេញ៖ មុនមួយថ្ងៃនៃពិធីបុណ្យចូលឆ្នាំថ្មី ប្រពៃណីជាតិ ដែលនឹងចាប់ផ្តើមនៅថ្ងៃស្អែក ពលរដ្ឋរស់នៅរាជធានីភ្នំពេញ នាថ្ងៃទី១៣ខែមេសានេះ សម្រុកទៅផ្សារ ដើម្បីទិញរណ្តាប់ថ្វាយទេវតាឆ្នាំថ្មី។

រណ្តាប់សែនទេវតាឆ្នាំថ្មី ដែលមានដូចជា បាយសី ផ្លែឈើ និងនំ ជាដើមនោះ នៅថ្ងៃនេះលក់ដាច់ច្រើនគួរសម។នេះជាការលើកឡើង របស់អាជីវករលក់ដូរក្នុងផ្សារទួលទំពូង បានប្រាប់BTVនៅថ្ងៃទី១៣ខែមេសានេះ។

ពួកគាត់ថា មុនមួយថ្ងៃនៃពិធីបុណ្យចូលឆ្នាំថ្មី ប្រពៃណីជាតិ ដែលនឹងចាប់ផ្តើមពីថ្ងៃស្អែក ពលរដ្ឋមកផ្សារច្រើនដើម្បីទិញរណ្តាប់សែនទេវតាឆ្នាំថ្មី ហើយតម្លៃក៏សមរម្យផងដែរ។ជាមួយគ្នានេះ ពលរដ្ឋមកផ្សារបានឱ្យដឹងដែរថា ក្រោយពេលរាជរដ្ឋាភិបាលសម្រេចរៀបចំពិធីបុណ្យចូលឆ្នាំថ្មី ឡើងវិញ គឺមាន​អារម្មណ៍​សប្បាយចិត្តក្រៃលែង ​ហើយមានគម្រោងដើរលេងកំសាន្តនៅតំបន់ផ្សេងៗ បន្ទាប់ពីសែនទេវតារួចនៅថ្ងៃទី១។

លោក ចំរើន សុខលីម ប្រធានគណៈកម្មការផ្សារទួលទំពូង បានឱ្យដឹងដែរថា តាម​ការ​សង្កេត​ភាគ​ច្រើន​លើសលុបអាជីវករ និងអ្នកមកផ្សារ យល់ដឹងច្រើនពីវិធីការពារកុំឱ្យឆ្លងជំងឺវីដ-១៩ ដោយ​ពួកគាត់​មានការពាក់ម៉ាស់ មានជេល និងអាកុល ជាប់ដៃជាដើម។

លើសពីនេះ លោកបានបង្ហាញពីវិធានការផ្សេងៗមួយចំនួនទៀត​របស់គណៈកម្មការផ្សារ ដើម្បី​ទប់ស្កាត់ជំងឺកូវីដ-១៩ ខណៈពលរដ្ឋសម្រុកមកផ្សារច្រើន​ ក្នុងពេលពិធីបុណ្យចូលឆ្នាំថ្មី នឹង​ចូលមកដល់នៅថ្ងៃស្អែក។

បុណ្យចូលឆ្នាំខ្មែរ ជាបុណ្យប្រពៃណីជាតិ ដែល​ប្រជាជននៅក្នុង​ប្រទេសកម្ពុជា​តែងតែ​ប្រារព្ធ​ធ្វើ​ជា​រៀងរាល់ឆ្នាំ។ មុនពេលប្រារព្ធពិធីបុណ្យ​ចូលឆ្នាំ១ ឬ២ថ្ងៃ ប្រជាជនខ្មែរតែងតែនាំគ្នា សំអាត តុបតែង​ផ្ទះសម្បែង និងរៀបចំគ្រឿងរណ្ដាប់ផ្សេងៗ ​ដើម្បីត្រៀម​ទទួលទេវតាឆ្នាំថ្មី យាងចុះមក​ប្រសិទ្ធិ​ពរជ័យ សិរីសួស្ដី ​ទទួល​បាន​សេចក្ដី​សុខពេញមួយឆ្នាំ៕ អត្ថបទ៖ ទូច សោភ័ណ