ប្រទេសចិន នៅថ្ងៃចន្ទ (ទី១១ ខែឧសភា ឆ្នាំ២០២៦) នេះ បានបញ្ជាក់ថា ខ្លួននឹងមិនអនុញ្ញាតឲ្យកោះតៃវ៉ាន់ចូលរួមក្នុងកិច្ចប្រជុំប្រចាំឆ្នាំរបស់អង្គការសុខភាពពិភពលោក (WHO) ដែលនឹងចាប់ផ្តើម នៅសប្តាហ៍ក្រោយនោះទេ ខណៈដែលតៃវ៉ាន់ បានប្រាប់ថា ខ្លួននឹងបញ្ជូនគណៈប្រតិភូមួយក្រុម សម្រាប់កិច្ចប្រជុំនៅក្រៅព្រឹត្តិការណ៍ជាក់ស្តែង។

កោះតៃវ៉ាន់ត្រូវបានដកចេញពីអង្គការអន្តរជាតិភាគច្រើន ដោយសារតែការជំទាស់ពីទីក្រុងប៉េកាំង ដែលចាត់ទុកកោះគ្រប់គ្រងដោយលទ្ធិប្រជាធិបតេយ្យនេះថា ជាទឹកដីរបស់ខ្លួន។ តៃវ៉ាន់បានចូលរួមសន្និបាតសុខភាពពិភពលោក (WHA) របស់ WHO ក្នុងនាមជាអ្នកសង្កេតការណ៍ពីឆ្នាំ២០០៩ ដល់ឆ្នាំ ២០១៦ ក្រោមរដ្ឋបាលរបស់មេដឹកនាំនាពេលនោះ គឺលោក Ma Ying-jeou ដែលបានចុះហត្ថលេខាលើកិច្ចព្រមព្រៀងពាណិជ្ជកម្ម និងទេសចរណ៍ដ៏សំខាន់ជាមួយចិន។

ប៉ុន្តែទីក្រុងប៉េកាំងបានចាប់ផ្តើមរារាំងការចូលរួមរបស់កោះតៃវ៉ាន់ នៅឆ្នាំ២០១៧ បន្ទាប់ពីមេដឹកនាំ នាពេលនោះ គឺលោកស្រី Tsai Ing-wen បានឈ្នះតំណែងអ្នកគ្រប់គ្រងកោះនេះ ក្រោយមានការបដិសេធរបស់លោកស្រី ដែលមិនយល់ស្របចំពោះជំហររបស់ចិន ដែលថា ទាំងចិន និងកោះតៃវ៉ាន់ គឺជាផ្នែកនៃ «ប្រទេសចិនតែមួយ»។ មេដឹកនាំបច្ចុប្បន្ន គឺលោក Lai Ching-te បានបន្តគោលនយោបាយរបស់លោកស្រី Tsai។

អ្នកនាំពាក្យក្រសួងការបរទេសចិន លោក Guo Jiankun បាននិយាយថា សាធារណរដ្ឋប្រជាមានិតចិន គឺជារដ្ឋាភិបាលស្របច្បាប់តែមួយគត់របស់ប្រទេសទាំងមូល។ លោកបានបញ្ជាក់នៅទីក្រុងប៉េកាំងថា៖ «ដើម្បីលើកកម្ពស់គោលការណ៍ចិនតែមួយ និងការពារភាពធ្ងន់ធ្ងរ និងសិទ្ធិអំណាចនៃសេចក្តីសម្រេចពាក់ព័ន្ធរបស់មហាសន្និបាតអង្គការសហប្រជាជាតិ និង WHA ប្រទេសចិន បានសម្រេចមិនយល់ព្រមឲ្យមានការចូលរួមរបស់តំបន់តៃវ៉ាន់ នៅក្នុង WHA ឆ្នាំនេះទេ»៕