នាថ្ងៃចន្ទ (ទី១១ ខែឧសភា ឆ្នាំ២០២៦) នេះ រដ្ឋមន្ត្រីការបរទេសអ៊ីរ៉ង់ និងអារ៉ាប៊ីសាអ៊ូឌីត បានពិភាក្សាគ្នាតាមទូរស័ព្ទ អំពីការវិវត្តចុងក្រោយបំផុតនៃដំណើរការការទូតដែលប៉ាគីស្ថានធ្វើជាអន្តរការី រវាងទីក្រុងតេអេរ៉ង់ និងវ៉ាស៊ីនតោន។

ទីភ្នាក់ងារសារព័ត៌មានរដ្ឋអ៊ីរ៉ង់ IRNA បានរាយការណ៍ថា ការពិភាក្សា រវាងលោក Abbas Araghchi និងព្រះអង្គម្ចាស់ Faisal bin Farhan បានក្លាយជាការជជែកតាមទូរស័ព្ទលើកទី២ រវាងភាគីទាំង២ ក្នុងរយៈពេល ២៤ម៉ោងកន្លងមក។

ភាពតានតឹងក្នុងតំបន់ បានកើនឡើងចាប់តាំងពីសហរដ្ឋអាមេរិក និងអ៊ីស្រាអែល បានបើកការវាយប្រហារលើអ៊ីរ៉ង់ កាលពីថ្ងៃទី២៨ ខែកុម្ភៈ ដែលបង្កឲ្យមានការសងសឹកពីទីក្រុងតេអេរ៉ង់ ប្រឆាំងនឹងអ៊ីស្រាអែល ក៏ដូចជាសម្ព័ន្ធមិត្តអាមេរិក នៅឈូងសមុទ្រ រួមជាមួយនឹងការបិទច្រកសមុទ្រ Hormuz។

បទឈប់បាញ់បានចូលជាធរមាននៅថ្ងៃទី៨ ខែមេសា តាមរយៈការសម្របសម្រួលដោយប៉ាគីស្ថាន ប៉ុន្តែការចរចា នៅទីក្រុងអ៊ីស្លាម៉ាបាដបានបរាជ័យ ក្នុងការសម្រេចបានកិច្ចព្រមព្រៀងយូរអង្វែង។ បន្ទាប់មក ប្រធានាធិបតីអាមេរិក លោក Donald Trump បានប្រកាសពង្រីកបទឈប់បាញ់ ដោយគ្មានកាលកំណត់កំណត់។

កាលពីថ្ងៃអាទិត្យចុងសប្ដាហ៍កន្លងមក អ៊ីរ៉ង់បានផ្ញើការឆ្លើយតបរបស់ខ្លួនទៅប៉ាគីស្ថាន ចំពោះសំណើរបស់សហរដ្ឋអាមេរិក ដើម្បីបញ្ចប់សង្គ្រាម ប៉ុន្តែលោក Trump បានបដិសេធវា ដោយចាត់ទុកថា «ជាការមិនអាចទទួលយកបានទាំងស្រុង»៕