នៅព្រឹកថ្ងៃចន្ទនេះ កងកម្លាំងអ៊ីស្រាអែល បានវាយឆ្មក់ជំរំ Qalandia ស្ថិតក្នុងតំបន់កាន់កាប់វ៉េសប៊ែង និងបានបាញ់ប្រហារ និងបាញ់ឧស្ម័នបង្ហូរទឹកភ្នែកនៅតំបន់នោះ ។

ទីភ្នាក់ងារព័ត៌មានផ្លូវការ WAFA របស់អាជ្ញាធរប៉ាឡេស្ទីន រាយការណ៍ថា យុវជនម្នាក់ បានរងរបួសយ៉ាងធ្ងន់ធ្ងរ ដោយសារកងកម្លាំងកាន់កាប់អ៊ីស្រាអែល អំឡុងការវាយឆ្មក់លើជំរំ Qalandia ។

ក្រោយមក ក្រសួងសុខាភិបាលប៉ាឡេស្ទីនបានប្រកាសថា យុវជនប៉ាឡេស្ទីនម្នាក់នោះ ត្រូវបានគេបាញ់សម្លាប់ដោយកងកម្លាំងអ៊ីស្រាអែល នៅជំរំ Qalandia ហើយសាកសពរបស់គាត់ ត្រូវបានយកទៅដោយកងកម្លាំងអ៊ីស្រាអែល ។

នគរបាលអ៊ីស្រាអែលនិយាយថា ឧបទ្ទេវហេតុនេះ កំពុងស្ថិតក្រោមការពិនិត្យពិច្ច័យ ហើយពួកគេនឹងផ្តល់សេចក្តីថ្លែងការណ៍លើបញ្ហានេះ ក្រោយការពិនិត្យបញ្ចប់ ។

សូមបញ្ជាក់ថា អំពើហិង្សា បានកើនឡើង នៅតំបន់វ៉េសប៊ែង ចាប់តាំងពីថ្ងៃទី ៧ ខែតុលា ឆ្នាំ ២០២៣រហូតមក ពេលដែលយោធាអ៊ីស្រាអែលបង្កើនការវាយឆ្មក់នៅទូទាំងតំបន់មួយនេះ ពោលគឺបន្ទាប់ការវាយប្រហាររបស់ក្រុមហាម៉ាសលើអ៊ីស្រាអែល សម្លាប់មនុស្ស ១.២០០នាក់ ៕