ប្រធានាធិបតីសហរដ្ឋអាមេរិក លោក Donald Trump បាននិយាយកាលពីថ្ងៃចន្ទ ១១ ឧសភា​​សប្ដាហ៍នេះ ថាបទឈប់បាញ់ជាមួយអ៊ីរ៉ង់គឺ "ស្ថិតក្នុងភាព​​ផុយស្រួយបំផុត" បន្ទាប់ពីការឆ្លើយតបរបស់ទីក្រុងតេអេរ៉ង់ចំពោះសំណើរបស់សហរដ្ឋអាមេរិកដើម្បីបញ្ចប់សង្គ្រាម បានបង្ហាញយ៉ាងច្បាស់ថាភាគីទាំងពីរនៅតែមានការ​ខ្វែង​គំនិតគ្នា​ខ្លាំងលើបញ្ហាមួយចំនួន។

អ៊ីរ៉ង់បានអំពាវនាវឱ្យបញ្ចប់សង្គ្រាមនៅគ្រប់​​​​​ទិសទី​​ទាំងអស់ រួមទាំងប្រទេសលីបង់ ជាទី​​ដែលសម្ព័ន្ធមិត្តរបស់សហរដ្ឋអាមេរិក ​គឺអ៊ីស្រាអែល កំពុងប្រយុទ្ធប្រឆាំងនឹងក្រុម​​សកម្មប្រយុទ្ធហេសបូឡាគាំទ្រដោយអ៊ីរ៉ង់។​​

ទីក្រុងតេអេរ៉ង់ក៏បានទាមទារផងដែរ​​​នូវ​​​សំណងសម្រាប់ការខូចខាតសង្គ្រាម ការបញ្ចប់ការបិទផ្លូវទឹក​​​ពីសំណាក់​​កងទ័ពជើងទឹក​សហរដ្ឋអាមេរិក ការធានាមិនឱ្យមានការវាយប្រហារបន្ថែមទៀត និងការបន្តការលក់ប្រេងរបស់អ៊ីរ៉ង់ឡើងវិញ។​ ​

ទីក្រុងតេអេរ៉ង់ក៏បានសង្កត់ធ្ងន់ផងដែរ​​លើអធិបតេយ្យភាពរបស់ខ្លួនលើច្រកសមុទ្រហ័រមូស​ (Strait of Hormuz)​ ជាកន្លែងដែលខ្លួនបានបិទចរាចរណ៍ដឹកជញ្ជូន ជាធម្មតាដឹកជញ្ជូនប្រេង និងឧស្ម័នមួយភាគប្រាំរបស់ពិភពលោក។​​​​​​​​​

លោក Trump បាននិយាយថា ការឆ្លើយតបរបស់អ៊ីរ៉ង់បានគំរាមកំហែងដល់ស្ថានភាពនៃបទឈប់បាញ់ដែលបានអនុវត្តចាប់តាំងពីថ្ងៃទី៧ ខែមេសា ២០២៦​ ​។​​​ ​​​ ​

លោក Trump ដែលបានគំរាម​ម្តងហើយម្តងទៀតថានឹងបញ្ចប់បទឈប់បាញ់ បាននិយាយថា លោក​​នឹងហៅបទឈប់បាញ់​នោះ​ថាខ្សោយបំផុតនៅពេលនេះ បន្ទាប់ពីបានអានក្រដាស​​សំរាមដែលពួកគេបានផ្ញើមកពួកលោក​​។ លោក​មិនបានអានចប់ទេ។​

សហរដ្ឋអាមេរិកបានស្នើឱ្យបញ្ចប់ការប្រយុទ្ធគ្នា មុនពេលចាប់ផ្តើមការចរចាលើបញ្ហាដ៏ចម្រូងចម្រាសជាងនេះ រួមទាំងកម្មវិធីនុយក្លេអ៊ែររបស់អ៊ីរ៉ង់ផងដែរ៕