រដ្ឋាភិបាលសហរដ្ឋអាមេរិក កាលពីថ្ងៃចន្ទ ទី១១ ខែឧសភា បានប្រកាសដាក់ទណ្ឌកម្មទៅលើមនុស្សបីនាក់ និងក្រុមហ៊ុនចំនួនប្រាំបួន រួមទាំងក្រុមហ៊ុនចំនួនបួនមានមូលដ្ឋាននៅទីក្រុងហុងកុង និងក្រុមហ៊ុនចំនួនបួននៅប្រទេសអារ៉ាប់រួម ចំពោះការជួយដល់ការដឹកជញ្ជូនប្រេងរបស់អ៊ីរ៉ង់ ទៅកាន់ប្រទេសចិន។

ក្រុមហ៊ុនទីប្រាំបួន មានមូលដ្ឋាននៅប្រទេសអូម៉ង់។ ចំណាត់ការរបស់ក្រសួងរតនាគារ ធ្វើឡើងបន្ទាប់ពីទណ្ឌកម្មជាច្រើនដែលត្រូវបានប្រកាសកាលពីថ្ងៃសុក្រលើបុគ្គល និងក្រុមហ៊ុនជួយដល់ការទិញអាវុធ និងគ្រឿងបន្លាស់របស់អ៊ីរ៉ង់ ដែលត្រូវបានប្រើប្រាស់ដើម្បីផលិតយានដ្រូន និងមីស៊ីលបាលីស្ទីក។

ការដាក់ទណ្ឌកម្មធ្វើឡើងប៉ុន្មានថ្ងៃនៅមុនជំនួបដែលបានគ្រោងទុករបស់ប្រធានាធិបតីសហរដ្ឋអាមេរិក លោក ដូណាល់ ត្រាំ ជាមួយលោក ស៊ី ជីនពីង ដែលលោកTrump ត្រូវបានគេរំពឹងថានឹងដាក់សម្ពាធលើមេដឹកនាំចិនឱ្យជួយដោះស្រាយការប្រឈមមុខដាក់គ្នាជាមួយអ៊ីរ៉ង់ និងបើកច្រកសមុទ្រហ័រមូសដ៏សំខាន់ ឡើងវិញ ។

ក្រសួងរតនាគារបាននិយាយថា ការកំណត់ថ្មីដោយការិយាល័យគ្រប់គ្រងទ្រព្យសកម្មបរទេស (OFAC) គឺសំដៅលើបុគ្គល និងអង្គភាពដែលបានជួយដល់កងឆ្មាំបដិវត្តន៍អ៊ីស្លាមអ៊ីរ៉ង់លក់ និងដឹកជញ្ជូនចំណែកប្រេងអ៊ីរ៉ង់ទៅប្រទេសចិន ដោយប្រើប្រាស់ក្រុមហ៊ុនមួយចំនួន។

លោក Scott Bessent រដ្ឋមន្ត្រីក្រសួងរតនាគារបាននិយាយថា រដ្ឋបាលលោក Trump នឹងបន្តបង្កើនសម្ពាធលើទីក្រុងតេអេរ៉ង់ ដើម្បីកុំឲ្យរដ្ឋាភិបាល និងយោធាអ៊ីរ៉ង់ទទួលបានមូលនិធិសម្រាប់អាវុធ និងកម្មវិធីនុយក្លេអ៊ែររបស់ខ្លួន ឬការគាំទ្រដល់ក្រុមតំណាងនៅក្នុងតំបន់។