តម្លៃប្រេងបានកើនឡើងក្នុងការជួញដូរវគ្គ​ដំបូង​នៅអាស៊ីនៅថ្ងៃអង្គារ ​​១២​ ឧសភា​​​ នេះ​​​ ខណៈការចរចាបញ្ចប់សង្គ្រាមរវាងសហរដ្ឋអាមេរិក និងអ៊ីរ៉ង់ ​ហាក់ដូចជាផុយស្រួយ ដោយ​​​ការឆ្លើយតបរបស់ទីក្រុងតេអេរ៉ង់ចំពោះសំណើរបស់សហរដ្ឋអាមេរិក ​បានបង្ហាញពី​ការ​ខ្វែងគំនិត​គ្នាយ៉ាង​​ខ្លាំង​ដែល​រក្សាការព្រួយបារម្ភអំពីការផ្គត់ផ្គង់សកល​។​ ​​​​​​​​​     

តម្លៃ​ប្រេងឆៅ ​Brent បានកើនឡើង៣០​​​ សេន ឬ០,២៩​% នៅតម្លៃ​​១០៤​​,៥១​​​ ដុល្លារក្នុងមួយបារ៉ែល ខណៈប្រេងឆៅ West Texas Intermediate របស់សហរដ្ឋអាមេរិកបានកើនឡើង៣១ សេន ឬ​ ០,៣២% ដល់តម្លៃ​ ​៩៨,៣៨​ ដុល្លារក្នុង​មួយ​បារ៉ែល​​នៅត្រឹមម៉ោង ​​០០​និង​២​នាទី​ ម៉ោងសកល ។ តម្លៃប្រេង​​គោល​ទាំងពីរបានកើនឡើងជិត​២,៨​​%កាលពីថ្ងៃចន្ទ​​១១​​​ឧសភា ​សប្ដាហ៍នេះ​។​​​​

ប្រធានាធិបតីសហរដ្ឋអាមេរិក លោក ​ Donald Trump បាននិយាយកាលពីថ្ងៃចន្ទ ថា បទឈប់បាញ់ជាមួយអ៊ីរ៉ង់គឺ "ផុយស្រួយខ្លាំងណាស់​​" ដោយចង្អុលបង្ហាញពីការមិនចុះសម្រុង​គ្នាលើការទាមទារជាច្រើន ដូចជាការបញ្ឈប់អរិភាពនៅគ្រប់ទិសទី ការដកចេញនូវការបិទផ្លូវទឹកពី​​សំណាក់​​កងទ័ពជើងទឹករបស់សហរដ្ឋអាមេរិក ការបន្តការលក់ប្រេងរបស់អ៊ីរ៉ង់ និងសំណងសម្រាប់ការខូចខាតដោយសង្គ្រាម។

ទីក្រុងតេអេរ៉ង់ក៏បានសង្កត់ធ្ងន់ផងដែរ​ ​លើអធិបតេយ្យភាពលើច្រកសមុទ្រហ័រមូស ដែលគ្រប់គ្រងលំហូរប្រេង និងឧស្ម័នធម្មជាតិរាវប្រហែលមួយភាគប្រាំនៃសកលលោក។

លោក Tim Waterer ប្រធានអ្នកវិភាគទីផ្សារសកល​​ KCM Trade បាននិយាយនៅក្នុងសារអេឡិច​​ត្រូនិក​​មួយថា ​​ដរាបណាការចរចារវាងសហរដ្ឋអាមេរិក និងអ៊ីរ៉ង់នៅតែមិនមានលទ្ធផលច្បាស់លាស់ ហើយលំហូរការដឹកជញ្ជូន​​​​តាមរយៈច្រកសមុទ្រហ័រមូសនៅតែមានកម្រិត ពិភពលោក​​គួរតែមើល​ឃើញតម្លៃប្រេង​​​ខ្ពស់ជាង១០០ ដុល្លារ ក្នុង​មួយ​បារ៉ែល​​៕