ប្រធានាធិបតីអាមេរិកលោក​​​ Donald Trump បាននិយាយកាលពីថ្ងៃចន្ទ ​​១១​​​ ឧសភាសប្ដាហ៍​នេះ​ ថា លោកនឹងពិភាក្សាអំពីប្រធានបទនៃការលក់អាវុធឱ្យទៅកោះតៃវ៉ាន់ និងករណីមហាសេដ្ឋីប្រព័ន្ធផ្សព្វផ្សាយដែលជាប់ពន្ធនាគារ លោក​ Jimmy Lai ជាមួយលោក​​ប្រធានាធិបតីចិន Xi Jinping នៅទីក្រុងប៉េកាំង សប្តាហ៍នេះ។​  

លោក Trump បានប្រាប់ក្រុម​​អ្នកសារ​​ព័ត៌មាននៅឯសេតវិមាននៅពេលសួរអំពីការគាំទ្រយូរអង្វែងរបស់ទីក្រុងវ៉ាស៊ីនតោនចំពោះវិស័យ​ការ​ពារជាតិរបស់​កោះ​តៃវ៉ាន់ថា ​រូប​​លោក​​នឹងមានការពិភាក្សានោះជាមួយប្រធានាធិបតី Xi។​​​​

ប្រទេសចិនអះអាងថា កោះដែលគ្រប់គ្រងដោយលទ្ធិប្រជាធិបតេយ្យមួយ​នេះ​ ​ គឺ​​​​ជាដែនខេត្តមួយ​​​​របស់ខ្លួន ជាការលើកឡើង​​​ដែលកោះ​តៃវ៉ាន់បដិសេធ។ ទីក្រុងវ៉ាស៊ីនតោន ​​អនុវត្តតាម​​​គោលនយោបាយចិនតែមួយ ​ដោយទទួលស្គាល់ឋានៈ​​​​របស់ប្រទេសចិន ប៉ុន្តែមិនគិតពីអធិបតេយ្យភាពរបស់តៃវ៉ាន់ទេ។ សហរដ្ឋអាមេរិកគឺជាអ្នកគាំទ្រអន្តរជាតិដ៏សំខាន់បំផុតរបស់តំបន់​​​តៃវ៉ាន់ ហើយត្រូវបានចងភ្ជាប់ដោយច្បាប់ដើម្បីជួយដល់​វិស័យ​​ការ​ពារជាតិរបស់កោះនេះ​ ។

ការផ្ទេរអាវុធទាំងនេះជាប្រភពនៃការកកិតគ្នា​​ជាយូរមកហើយនៅក្នុងទំនាក់ទំនងរវាង​អាមេរិក និងចិន។ កាលពីខែធ្នូ លោក Trump បានប្រកាសពីកញ្ចប់អាវុធដ៏ធំបំផុតមិនធ្លាប់មានរបស់សហរដ្ឋអាមេរិកសម្រាប់កោះនេះ ​ក្នុង​​តម្លៃជាង ១​១ ពាន់លានដុល្លារ។

ក្នុងរយៈពេលប៉ុន្មានថ្ងៃថ្មីៗនេះ ជំនួយការរបស់ប្រធានាធិបតីអាមេរិក​​មកពី​​គណបក្ស​​សាធារណរដ្ឋរូបនេះបានជំរុញឱ្យកោះ​​​តៃវ៉ាន់ចំណាយប្រាក់កាន់តែច្រើនសម្រាប់ការការពារជាតិ ហើយមន្ត្រីអាមេរិកម្នាក់បាននិយាយថា កិច្ចប្រជុំកំពូល​លោក​Trump និង​លោក​ ​Xi ពុំ​​​បានបង្ហាញពីការផ្លាស់ប្តូរគោលនយោបាយចំពោះកោះ​​តៃវ៉ាន់ទេ៕