ក្រុម​អាជ្ញាធរដែនសមុទ្របាននិយាយថា ទូកមួយគ្រឿងដឹកជនអន្តោប្រវេសន៍គ្មានឯកសារចំនួន ៣៧នាក់ ដែលគេជឿថាមកពីប្រទេសឥណ្ឌូនេស៊ី ​​បានលិចនៅឆ្នេរសមុទ្រ ប៉ាងគ័រ ​ (​Pangkor)នៅឆ្នេរសមុទ្រភាគខាងលិចរបស់ប្រទេសម៉ាឡេស៊ី បណ្ដា​ឱ្យមនុស្ស ១៤នាក់នៅ​តែបាត់ខ្លួន។​

ទីភ្នាក់ងារអនុវត្តច្បាប់ដែនសមុទ្រម៉ាឡេស៊ី (MMEA) នៅរដ្ឋ ប៉េរ៉ាក់ ​ (​Perak)បាននិយាយថា ខ្លួនត្រូវបានជូនដំណឹងកាលពី​​ព្រឹកថ្ងៃចន្ទ១១ ខែឧសភា សប្ដាហ៍នេះ ​ដោយអ្នក​នេសាទក្នុងស្រុកម្នាក់ ដែលបានប្រទះ​​​ឃើញអ្នកនៅរស់រានមានជីវិតអណ្តែតនៅលើសមុទ្រ។​​ ​

លោក Mohamad Shukri Khotob នាយកទីភ្នាក់​ងារ​​ MMEA ប្រចាំ​​រដ្ឋប៉េរ៉ាក់ បាននិយាយនៅក្នុងសេចក្តីថ្លែងការណ៍មួយ​ចេញផ្សាយកាលពី​​យប់ថ្ងៃច​ន្ទថា ការស៊ើបអង្កេតបឋម​​​ បានរកឃើញថា ចំនួនសរុបនៃជនអន្តោប្រវេសន៍នៅលើទូកមាន​ ៣៧នាក់។ រហូតមកដល់ពេលនេះ ជនរងគ្រោះចំនួន ២៣នាក់ត្រូវបានជួយសង្គ្រោះ ខណៈ​កិច្ចខិតខំប្រឹងប្រែងកំពុងបន្តដើម្បីស្វែងរក​​អ្នកនៅសេសសល់។​

លោក Mohamad Shukri បានបន្ថែមថា ​ការស៊ើបអង្កេតដំបូងក៏បានរកឃើញផងដែរថា ពួកគេដែលជាជនអន្តោប្រវេសន៍ ​បានចាកចេញពីទីក្រុង គីសារ៉ាន ​ (Kisaran)ប្រទេសឥណ្ឌូនេស៊ី នៅថ្ងៃទី៩ ខែឧសភា ហើយបានឆ្ពោះទៅកាន់គោលដៅជាច្រើននៅក្នុងប្រទេសម៉ាឡេស៊ី រួមទាំងទីក្រុងប៉េណាង រដ្ឋតេរេងហ្គានូ រដ្ឋសេឡាំងហ្គ័រ និងរដ្ឋធានី​​ គូឡាឡាំពួរ។​​​​​

លោក​​ថា ទីភ្នាក់ងារ​នេះ​បាន​ដាក់​ពង្រាយ​ទូក ឧទ្ធម្ភាគចក្រ និង​យន្តហោះ​ស៊ើបការណ៍​ដើម្បី​ស្វែងរក​អ្នក​បាត់​ខ្លួន។ អ្នក​ដែល​ត្រូវ​បាន​ជួយ​សង្គ្រោះ​ត្រូវ​បាន​ប្រគល់​ទៅ​ឲ្យ​នគរបាល​​សម្រាប់​​ការ​​​ស៊ើបអង្កេត​បន្ថែម៕