រដ្ឋាភិបាលអឺរ៉ុបកាលពីថ្ងៃចន្ទ បានបដិសេធការលើកឡើងរបស់ប្រធានាធិបតីរុស្ស៊ី លោក វ្ល៉ាឌីមៀ ពូទីន (Vladimir Putin) ដែលថា អតីតអធិការបតីអាល្លឺម៉ង់លោក Gerhard Schroeder អាចតំណាងឲ្យពួកគេ នៅក្នុងកិច្ចពិភាក្សានាពេលអនាគត ជាមួយទីក្រុងមូស្គូស្តីពីសន្តិសុខនៃទ្វីបនេះ។

លោក ពូទីន បាននិយាយកាលពីថ្ងៃសៅរ៍ថា លោកជឿថា សង្គ្រាមនៅអ៊ុយក្រែនកំពុងឈានដល់ទីបញ្ចប់ ហើយលោកនឹងមានឆន្ទៈក្នុងការចរចាការរៀបចំសន្តិសុខថ្មីសម្រាប់អឺរ៉ុប ដោយមានលោក Schroeder ជាដៃគូដែលលោកពេញចិត្ត។ ប៉ុន្តែរដ្ឋមន្ត្រីការបរទេសសហភាពអឺរ៉ុប ដែលចូលរួមកិច្ចប្រជុំមួយនៅទីក្រុង ប្រ៊ុចសែល មានការសង្ស័យថា រុស្ស៊ីបានត្រៀមខ្លួនរួចរាល់ហើយ ដើម្បីបញ្ចប់សង្គ្រាម និងចរចាដោយស្មោះត្រង់អំពីសន្តិភាព និងសន្តិសុខសម្រាប់អឺរ៉ុប។

ពួកគេបានច្រានចោលតួនាទីណាមួយសម្រាប់លោក Schroeder ដែលធ្លាប់ធ្វើការឲ្យក្រុមហ៊ុនរដ្ឋរុស្ស៊ី និងបានបង្កើតទំនាក់ទំនងជិតស្និទ្ធជាមួយលោក ពូទីន។ លោកស្រី Kaja Kallas ប្រធានគោលនយោបាយការបរទេសសហភាពអឺរ៉ុប បានប្រាប់អ្នកយកព័ត៌មានថា៖«វាច្បាស់ណាស់ថាហេតុអ្វីបានជាលោក ពូទីនចង់ឲ្យ Schroeder ក្លាយជាអ្នកតំណាងនេះ ដូច្នេះតាមពិតទៅ...លោក Schroeder នឹងមានឥទ្ធិពលទៅលើភាគីទាំងសងខាង»។

លោកស្រី Kallas អតីតនាយករដ្ឋមន្ត្រីនៃប្រទេសអេស្តូនី ជារដ្ឋបាល់ទិកមួយ ដែលត្រូវបានគ្រប់គ្រងដោយទីក្រុងមូស្គូជាផ្នែកមួយនៃសហភាពសូវៀត បានថ្លែងថា៖«ប្រសិនបើយើងផ្តល់សិទ្ធិដល់ប្រទេសរុស្ស៊ីក្នុងការតែងតាំងអ្នកចរចាក្នុងនាមយើង...នោះនឹងមិនសមហេតុផលទេ»៕