យោងតាមរបាយការណ៍មួយដែលបានចេញផ្សាយ កាលពីថ្ងៃចន្ទ (ទី១១ ខែឧសភា ឆ្នាំ២០២៦) បានបង្ហាញថា ប្រទេសអេមីរ៉ាតអារ៉ាប់រួម (UAE) បានធ្វើការវាយប្រហារជាបន្តបន្ទាប់ដោយសម្ងាត់ លើអ៊ីរ៉ង់ ក្នុងអំឡុងពេលសង្គ្រាមអាមេរិក-អ៊ីស្រាអែលដែលកំពុងបន្តមាន។

ដោយបាននិយាយក្នុងលក្ខខណ្ឌមិនបញ្ចេញឈ្មោះ ប្រភពដែលដឹងពីបញ្ហានេះ បានប្រាប់សារព័ត៌មាន The Wall Street Journal (WSJ) ថា មានការកំណត់គោលដៅមួយ គឺរោងចក្រចម្រាញ់ប្រេង នៅលើកោះ Lavan របស់អ៊ីរ៉ង់។ តាមរយៈប្រភពទាំងនេះ សារព័ត៌មាន WSJ បានឲ្យដឹងថា រោងចក្រចម្រាញ់ប្រេងនោះ ត្រូវបានវាយប្រហារកាលពីដើមខែមេសា នៅពេលដែលប្រធានាធិបតីអាមេរិក លោក Donald Trump ហៀបនឹងប្រកាសបទឈប់បាញ់ជាមួយអ៊ីរ៉ង់ ដែលបណ្តាលឲ្យមានអគ្គិភ័យដ៏ធំឆាបឆេះឡើង ហើយបានធ្វើឲ្យរោងចក្រនេះមិនអាចដំណើរការបាន។

អ៊ីរ៉ង់បានសងសឹកដោយការបាញ់មីស៊ីលបាលីស្ទិក និងយានដ្រូនទៅអារ៉ាប់រួម និងគូវ៉ែត។ ម្នាក់ ក្នុងចំណោមប្រភពទាំងនេះ បាននិយាយថា សហរដ្ឋអាមេរិកបានស្វាគមន៍ការចូលរបស់អារ៉ាប់រួមដោយស្ងាត់ៗ ក្នុងសង្គ្រាមនេះ។ របាយការណ៍របស់សារព័ត៌មាន WSJ បានឲ្យដឹងទៀតថា អ៊ីរ៉ង់បានកំណត់គោលដៅអារ៉ាប់រួមច្រើន ជាងប្រទេសដទៃទៀត រួមទាំងអ៊ីស្រាអែលផងដែរ ដោយបានធ្វើការវាយប្រហារដោយមីស៊ីល និងយានដ្រូនជាង ២.៨០០លើក លើប្រទេសឈូងសមុទ្រមួយនេះ។

ក្រសួងការបរទេសអារ៉ាប់រួម មិនបានធ្វើអត្ថាធិប្បាយអ្វីឡើយ ពាក់ព័ន្ធនឹងការវាយប្រហារនេះ នៅពេលដែលសារព័ត៌មានបានស្នើឲ្យធ្វើការពន្យល់។ តែយ៉ាងណាក្ដី ក្រសួងបានចង្អុលបង្ហាញទៅសេចក្តីថ្លែងការណ៍ចេញផ្សាយកាលពីមុន ដែលបានសង្កត់ធ្ងន់លើសិទ្ធិរបស់ទីក្រុង Abu Dhabi ក្នុងការឆ្លើយតបទៅនឹងសកម្មភាពអរិភាព៕