នាថ្ងៃអង្គារ (ទី១២ ខែឧសភា ឆ្នាំ២០២៦) នេះ អ្នកវិទ្យាសាស្ត្របានព្រមានថា បម្រែបម្រួលអាកាសធាតុបានជំរុញឲ្យមានការកើនឡើងនូវចំហេះព្រៃ នៅទ្វីបអាហ្វ្រិក អាស៊ី និងកន្លែងផ្សេងទៀត នៅឆ្នាំនេះ ដោយស្ថានភាពត្រូវបានគេរំពឹងថា នឹងកាន់តែអាក្រក់ទៅៗ នៅពេលដែលរដូវក្តៅនៅអឌ្ឍគោលខាងជើង ខិតជិតមកដល់ និងគំរូអាកាសធាតុ El Nino ចាប់ផ្តើម។

ចំហេះឆេះព្រៃ ចាប់ពីខែមករា ដល់ខែមេសា បានបណ្តាលឲ្យមានការខូចខាតកម្រិតមិនធ្លាប់មានពីមុន ដោយបានដុតបំផ្លាញផ្ទៃដីជាង ១៥០លានហិកតា ដែលជាកម្រិតខ្ពស់ជាង ២០ភាគរយលើកំណត់ត្រាពីមុន។ នេះបើយោងតាមទិន្នន័យដែលចងក្រងដោយ World Weather Attribution (WWA) ជាក្រុមស្រាវជ្រាវដែលសិក្សាពីផលប៉ះពាល់ ដោយសារការឡើងកម្ដៅផែនដី អំឡុងពេលមានអាកាសធាតុអាក្រក់ខ្លាំង។

ក្រុមអ្នកស្រាវជ្រាវបានលើកឡើងថា កំណត់ត្រាសីតុណ្ហភាព អាចត្រូវបានបំបែកនៅឆ្នាំនេះ ដែលបណ្តាលឲ្យមានគ្រោះរាំងស្ងួតយ៉ាងទូលំទូលាយ ក៏ដូចជាចំហេះព្រៃ ដោយផលប៉ះពាល់ពីបម្រែបម្រួលអាកាសធាតុដែលបង្កឡើងដោយស្នាដែមនុស្ស មានសភាពកាន់តែធ្ងន់ធ្ងរឡើងដោយសារឥទ្ធិពលបាតុភូត «អែលនីណូ» ដ៏ខ្លាំងក្លា។

លោក Theodore Keeping អ្នកជំនាញខាងចំហេះព្រៃពីស្ថាប័ន Imperial College London និងជាផ្នែកនៃក្រុម WWA បាននិយាយថា៖ «ខណៈពេលដែលនៅក្នុងតំបន់ជាច្រើននៃពិភពលោក រដូវចំហេះព្រៃសកលមិនទាន់កើនឡើងខ្លាំងនៅឡើយ ការចាប់ផ្តើមយ៉ាងឆាប់រហ័សនេះ រួមផ្សំជាមួយនឹងការព្យាករអាកាសធាតុ El Nino មានន័យថា យើងកំពុងសម្លឹងមើលឆ្នាំដ៏ធ្ងន់ធ្ងរមួយកើតឡើង»៕