អង្គការលើកលែងទោសអន្តរជាតិ (Amnesty International) បានឲ្យដឹងនៅថ្ងៃអង្គារ (ទី១២ ខែឧសភា ឆ្នាំ២០២៦) នេះថា យ៉ាងហោចណាស់ជនស៊ីវិល ១០០នាក់ ត្រូវបានសម្លាប់ អំឡុងការវាយប្រហារតាមអាកាសរបស់យោធានីហ្សេរីយ៉ា លើផ្សារដ៏មមាញឹកមួយកន្លែង នៅភាគពាយ័ព្យនៃរដ្ឋ Zamfara ដោយជំរុញឲ្យអាជ្ញាធរបើកការស៊ើបអង្កេតបន្ទាន់។

ការវាយប្រហារតាមអាកាស ដែលបានវាយប្រហារផ្សារដាច់ស្រយាលឈ្មោះ Tumfa ក្នុងតំបន់ Zurmi កាលពីថ្ងៃអាទិត្យចុងសប្ដាហ៍កន្លងមក គឺជាការវាយប្រហារលើកទី២ ដែលបានសម្លាប់មនុស្សរាប់សិបនាក់នៅក្នុងផ្សារដ៏មមាញឹក នៅភាគខាងជើងនៃប្រទេសនីហ្សេរីយ៉ា ក្នុងរយៈពេលត្រឹមតែមួយខែ។

Amnesty បានឲ្យដឹងទៀតថា អ្នករងរបួសរាប់សិបអ្នកទៀត កំពុងសម្រាកព្យាបាលនៅមន្ទីរពេទ្យ ក្នុងរដ្ឋ Zurmi និងរដ្ឋ Shinkafi ដែលនៅក្បែរនោះ ដោយបន្ថែមថា ភាគច្រើននៃអ្នកស្លាប់ទាំងនោះ គឺជាស្ត្រី និងក្មេងស្រី។

យោធានីហ្សេរីយ៉ាមិនបានឆ្លើយតបភ្លាមៗនោះឡើយ ចំពោះសំណើសុំការអត្ថាធិប្បាយ ប៉ុន្តែពីមុន បានបដិសេធថា ខ្លួនមិនបានកំណត់គោលដៅលើជនស៊ីវិលទេ ដោយនិយាយថា ការវាយប្រហារតាមអាកាស គឺផ្អែកលើព័ត៌មានចារកម្ម និងវាយប្រហារតែក្រុមសកម្មប្រយុទ្ធប៉ុណ្ណោះ។

ដោយសំអាងដក់សាក្សី អង្គការនេះបានឲ្យដឹងថា យន្តហោះយោធាត្រូវបានគេប្រទះឃើញហោះជុំវិញតំបន់នោះ នៅថ្ងៃត្រង់ ហើយបានត្រឡប់មកវិញប្រហែល ២ម៉ោងក្រោយ និងបានវាយប្រហារផ្សារដ៏មមាញឹកនោះ៕