ប្រធានក្រុមហេសបូឡា លោក Naim Qassem បាននិយាយនៅថ្ងៃអង្គារនេះថា អាវុធរបស់ក្រុមដែលគាំទ្រដោយអ៊ីរ៉ង់របស់លោក គឺមិនមែនជាផ្នែកមួយនៃការចរចានាពេលខាងមុខរវាងលីបង់ និងអ៊ីស្រាអែលទេ ហើយបានប្តេជ្ញាថា ប្រយុទ្ធជនរបស់លោក នឹងប្រែក្លាយសមរភូមិទៅជា «ឋាននរក» សម្រាប់កងកម្លាំងអ៊ីស្រាអែល។

លោក Qassem បាននិយាយនៅក្នុងសេចក្តីថ្លែងការណ៍ជាលាយលក្ខណ៍អក្សរមួយ ផ្ញើទៅកាន់ក្រុមយុទ្ធជនរបស់ក្រុមនេះ និងចាក់ផ្សាយនៅលើប៉ុស្តិ៍ទូរទស្សន៍ Al-Manar របស់ខ្លួនថា៖«គ្មាននរណាម្នាក់នៅខាងក្រៅលីបង់ មានជាប់ពាក់ព័ន្ធនឹងអាវុធ ការតស៊ូនោះទេ... នេះគឺជាបញ្ហាផ្ទៃក្នុងរបស់លីបង់ ហើយមិនមែនជាផ្នែកនៃការចរចាជាមួយសត្រូវទេ»។

ការចរចាជុំទី៣ រវាងតំណាងលីបង់ និងអ៊ីស្រាអែល ត្រូវបានកំណត់ឲ្យធ្វើឡើង នៅថ្ងៃព្រហស្បតិ៍ និងថ្ងៃសុក្រ សប្តាហ៍នេះ នៅទីក្រុងវ៉ាស៊ីនតោន បន្ទាប់ពីកិច្ចប្រជុំផ្ទាល់លើកដំបូង ក្នុងរយៈពេលជាច្រើនទសវត្សរ៍រវាងភាគីទាំងពីរ ត្រូវបានធ្វើឡើង កាលពីខែមុន។

ប្រធានាធិបតីអាមេរិក លោក ដូណាល់ ត្រាំ (Donald Trump) បានប្រកាសពីបទឈប់បាញ់ រយៈពេលប៉ុន្មានថ្ងៃបន្ទាប់ពីកិច្ចប្រជុំលើកដំបូង៕