ប្រទេស​រុស្ស៊ី នៅ​ថ្ងៃអង្គារ (ទី១២ ខែឧសភា ឆ្នាំ២០២៦) នេះ បាន​ឲ្យ​ដឹង​ថា កងកម្លាំងរបស់ខ្លួន បានបន្ត «ប្រតិបត្តិការយោធាពិសេស» នៅអ៊ុយក្រែន បន្ទាប់ពីបទឈប់បាញ់ បាន​ឈាន​ដល់​ទី​បញ្ចប់​កាល​ពី​យប់ថ្ងៃចន្ទ។

នៅក្នុងសេចក្តីថ្លែងការណ៍មួយ ក្រសួងការពារជាតិរុស្ស៊ីបានអះអាងថា ទីក្រុងមូស្គូបាន «គោរពយ៉ាងតឹងរ៉ឹង» ចំពោះ​បទឈប់បាញ់ដែលចាប់ផ្តើមនៅថ្ងៃទី៨ ខែឧសភា ខណៈពេលដែលចោទប្រកាន់អ៊ុយក្រែនថា បានរំលោភលើបទឈប់បាញ់ចំនួន ៣០.៣៨៣ដង​។

ក្នុងសេចក្តីថ្លែងការណ៍ដែលបានចេញផ្សាយនៅលើបណ្ដាញ​សង្គម Max របស់​រុស្ស៊ី ក្រសួង​បានឲ្យ​ដឹង​ថា៖ «ទោះបីជាមានការប្រកាសបទឈប់បាញ់ក៏ដោយ ក៏​កងកម្លាំងប្រដាប់អាវុធអ៊ុយក្រែន បានធ្វើការវាយប្រហារ ដោយប្រើប្រាស់​យានដ្រូន​ និងបាញ់កាំភ្លើងធំទៅលើទីតាំងកងទ័ពរុស្ស៊ី»។

ជាមួយ​គ្នានេះ ក្រសួងក៏បានអះអាងផងដែរថា អ៊ុយក្រែនបានវាយប្រហារ​ដោយ​យានដ្រូន​ចំនួន ៥.៨២៥​គ្រឿង កាល​ពី​ថ្ងៃចន្ទ ដោយបន្ថែមថា រុស្ស៊ី «បានឆ្លើយតបដូចគ្នា»។

នៅ​មុននេះ ប្រធានាធិបតីអ៊ុយក្រែន Volodymyr Zelenskyy បានអះអាងថា រុស្ស៊ីបានវាយប្រហារ​ដោយ​យានដ្រូន​ជាង ២០០គ្រឿង ពេញមួយយប់ ដោយចោទប្រកាន់ទីក្រុងមូស្គូថា បានជ្រើសរើស «បញ្ចប់បទឈប់បាញ់ដោយផ្នែក»។

គួរបញ្ជាក់​ថា បទឈប់បាញ់រយៈពេល ៣ថ្ងៃ រវាងរុស្ស៊ី និងអ៊ុយក្រែន ដែលស្នើឡើងដោយប្រធានាធិបតីអាមេរិក លោក​ Donald Trump បានផុតកំណត់នៅម៉ោង ២១:០០ ម៉ោង​សកល​ នាថ្ងៃចន្ទ។ លោក Trump បាននិយាយកាលពីថ្ងៃសុក្រថា ទីក្រុងមូស្គូ និងគីវ បានយល់ព្រមលើបទឈប់បាញ់ចាប់ពីថ្ងៃទី៩ ដល់ថ្ងៃទី១១ ខែឧសភា ដោយ​មាន​ការដោះដូរអ្នកទោស ១.០០០នាក់ទៅមកស្មើគ្នា ដោយពណ៌នាអំពីចំណាត់ការ​នេះថា ជាជំហានដែលអាចឆ្ពោះទៅរកការបញ្ចប់សង្គ្រាម៕